Qubada “İllərin sənətkarı” milli aşpazlar mükafatı təqdim olunub FOTO VİDEO
Quba, 27 may, Elxan Yusifli, AZƏRTAC
Mayın 27-də Qubada “İllərin sənətkarı” milli aşpazlar mükafatı təqdim olunub.
AZƏRTAC-ın bölgə müxbiri xəbər verir ki, “Azərbaycan Aşpazlar Gildiyası” və “Diyar.Az” qastronomiya xəritəsinin layihə rəhbəri, Dünya Restoran İdmanı Federasiyasının vitse-prezidenti Nigar Əmirbəyova tərəfindən birgə təsis edilən mükafata Qubada fəaliyyət göstərən iki istedadlı aşpaz layiq görülüb.
Təqdimatdan öncə qonaqlar baş aşpaz Xalid Fətullayevin daş üzərində dadlı yeməklər bişirmə prosesini izləyiblər. İyirmi üç ildir aşpazlıq edən X.Fətullayev məlumat verib ki, burada qədim Azərbaycan mətbəxinin elementləri öz əksini tapıb. Üzərində yemək bişirilən daşlar Şahdağın ətəklərindən, “Atəşgah” adlanan yerdən gətirilib. Ucqar dağ kəndlərində daş üzərində yemək bişirmək ənənəsi bu gün də yaşadılır.
“Daş üzərində bişirilən can əti, quzu əti, toyuq, balıq, göbələk, tərəvəz və digər təamlar ləziz dada malik olur. Ət qurumur, ətirli və dadlı qalır. Bu, qədimdən bizə gəlib çatan bir mətbəx növüdür. Biz bu ənənələri qoruyub saxlamalı və gələcək nəsillərə ötürməliyik. Bizim daşüstü yeməkləri dadan yerli, həm də xarici turistlər çox bəyənirlər”, - deyə o əlavə edib.
Tədbirin təşkilatçılarından olan Nigar Əmirbəyova bildirib ki, bu il ilk dəfədir mükafatlandırma mərasimi bölgədə təşkil edilir.
“Paytaxtla yanaşı, bizim bölgələrimizdə də çox istedadlı aşpazlar var. Onları tanıtmaq, geniş auditoriyaya təqdim etmək lazımdır. Bəzən bölgələrdən olan sənətkarlar Bakı şəhərində keçirilən təqdimatlardan kənarda qalır. Ona görə də qərara aldıq ki, özümüz bölgələrə səfər edib, istedadlı aşpazları mükafatlandıraq. Bu gün Qubada iki çox bacarıqlı aşpaza sertifikat və medal təqdim edəcəyik. Milli aşpazlar mükafatının ənənəvi təqdim olunması və ölkəmizin bütün bölgələrini əhatə etməsi nəzərdə tutulub. Bununla da Azərbaycan milli mətbəxini təbliğ edən bütün usta aşpazları önə çıxarmaq mümkün olacaq”, - deyə Nigar Əmirbəyova qeyd edib.
“Azərbaycan Aşpazlar Gildiyası”nın təsisçisi, Bakı Kulinariya Assosiasiyasının sədri İlkin Əkbərzadə AZƏRTAC-ın bölgə müxbirinə müsahibəsində bildirib ki, mükafatlandırılanlar kulinariya sahəsində uzun illər təcrübəsi olan və öz peşəkarlığı ilə seçilən aşpazlardır: “İllərin sənətkarı” mükafatını təqdim etməkdə əsas məqsəd Azərbaycan milli mətbəxinin usta aşpazlarını və bu sahədə əməyi keçən şəxsləri tanıtmaqdır. Çünki milli mətbəximizin dünyada təmsil edilməsində aşpazlarımızın xüsusi rolu var”.
“İllərin sənətkarı” mükafatının təqdimatı ötən il Bakı şəhərində oldu. Paytaxtdan və regionlardan 40-a yaxın aşpaz mükafatlandırılmışdı. Amma bölgələrdən olan bəzi istedadlı aşpazlarımız həmin tədbirə qatıla bilməmişdi. Buna görə də biz mükafatın təqdimatını bölgələrimizdə də təşkil etmək qərarına gəldik. İlk səfərimiz Qubaya oldu. Azərbaycan milli mətbəxi çox zəngin ənənələrə malikdir. Mədəniyyətimizin bir hissəsi olan milli mətbəximizi yüksək səviyyədə təqdim və təmsil etmək isə bu sahənin peşəkarları olan aşpazların üzərinə düşür. Bizim məqsədimiz paytaxtda və bölgələrdə yaşayan təcrübəli aşpazlarımızı ictimaiyyətlə yaxından tanış etməkdir. Cəmiyyətimizdə bu sahədə fəal olan çoxlu gənclərimiz var və ümid edirəm ki, onlar bu sahənin inkişafına öz töhfələrini verəcəklər”, - deyə İlkin Əkbərzadə vurğulayıb.
Qonaqlara qubalı aşpaz Tatyana Xəlilovanın hazırladığı qazan yeməkləri də təqdim olunub. Saxsı qabda bişirilən kənd toyuğundan Quba pitisi, əməköməci yarpağında dolma, saxsı küpdə göbələk və başqa təamlar maraqla qarşılanıb.
Qonaqlar usta aşpazların hazırladığı milli mətbəximizin ləziz təamlarından dadıblar.
Gənc aşpaz, Bakı Kulinariya Assosiasiyasının komanda kapitanı Sərxan İmanlı bildirib ki, bu kimi tədbirlər təcrübə toplamaq baxımından da olduqca əhəmiyyətlidir: “Bizim kimi gənc aşpazlar illərini bu sənətə verən ustaların təcrübəsindən faydalanırlar. Qubada daş üzərində bişirilən təamlar diqqətimi çəkdi. Biz bu yaxınlarda Birləşmiş Ərəb Əmirliklərindən yarışdan qayıtmışıq. Nailiyyətlərimiz çox oldu. Qızıl, gümüş və bürünc medallar qazandıq. Mən yalnız finalda çinli aşpazdan geri qalaraq gümüş medal qazandım. Çalışırıq ki, Azərbaycanımızın milli yeməklərini modern şəkildə dünyaya tanıdaq. Yarışda albalı qovurma, balıq sırdağı və ləvəngilər təqdim etmişdik”, - deyə o bildirib.
Daha sonra “İllərin sənətkarı” milli mükafatı təqdim edilib. Qubalı usta aşpazlar Xalid Fətullayev və Tatyana Xəlilova “Azərbaycan Kulinariyasının inkişafında xüsusi xidmətlərinə görə” sertifikat və medalla təltif ediliblər.
Mükafatçılar onların fəaliyyətini yüksək səviyyədə qiymətləndirdiklərinə görə təşkilatçılara təşəkkürlərini bildiriblər.
Bölmənin digər xəbərləri
