20 İYUN YURD-YUVASINDAN MƏHRUM OLMUŞ İNSANLARIN HƏMRƏYLİYİ GÜNÜDÜR
Hər il iyunun 20-də BMT Ümumdünya Qaçqınlar Gününü qeyd etməklə bütün dünyanı qaçqınların və məcburi köçkünlərin vəziyyətinə diqqət yetirməyə çağırır. Ümumdünya Qaçqınlar Günü 2000-ci ilin dekabrın 4-də BMT-nin Baş Məclisi tərəfindən yekdilliklə qəbul olunmuş qətnamə ilə təsis edilmişdir.
İyunun 20-də qaçqınların və məcburi köçkünlərin cəsurluğu, mətanət və iradəsi qeyd olunmaqla onlara mənəvi dəstək verilir. Bu, yurd-yuvasından məhrum olmuş, şərəf və ləyaqətini ən çətin şəraitdə qorumaq üçün mübarizə aparan insanların həmrəyliyi günüdür.
BMT-nin Bakı nümayəndəliyindən AZƏRTAC-a bildirmişlər ki, BMT-nin Qaçqınlar üzrə Ali Komissarlığı (QAK) təşkilatın başlıca məramı olan “Himayə”ni 2008-ci ildə Ümumdünya Qaçqınlar Gününün mövzusu kimi seçmişdir.
2007-ci ilin sonunda QAK-ın himayəsində olan qaçqınların sayı 9,9 milyon nəfərdən 11,4 milyon nəfərə çatmışdır. Münaqişələr nəticəsində ölkə daxilində köçürülmüş şəxslərin sayı 24,4 milyon nəfərdən 26 milyon nəfərə qalxmışdır. Qurumun himayəsində olan şəxslərin ümumi sayı 2007-ci il ərzində 2,5 milyon nəfər artaraq ilin sonunda görünməmiş həddə - 25,1 milyona çatmışdır.
Bu gün Ali Komissarlıq 6300 nəfərlik heyətlə 120 ölkədə fəaliyyət göstərir. Azərbaycanda bu qurumun 20 nümayəndəsi vardır. Onlar qaçqın və sığınacaq axtaran şəxslərə zəruri maddi yardımın göstərilməsi ilə məşğuldurlar.
Azərbaycan hökuməti tərəfindən 250 mindən çox qaçqının inteqrasiya edilməsi və yarım milyondan artıq məcburi köçkünün yaşayış şəraitinin yaxşılaşdırılması BMT-nin Qaçqınlar üzrə Ali Komissarı və BMT Baş Katibinin məcburi köçkünlərin hüquqları üzrə xüsusi nümayəndəsi tərəfindən təqdirəlayiq hal kimi qiymətləndirilmişdir. Təşkilat məcburi köçkünlərin üzləşdikləri humanitar problemlərin aradan qaldırılmasında, onların hüquqlarının, o cümlədən Dağlıq Qarabağ münaqişəsinin sülh yolu ilə həlli nəticəsində öz doğma yurdlarına qayıtmaq hüququnun qorunması sahəsində Azərbaycan hökumətinin səylərinə fəal şəkildə qoşulmuşdur və dəstək vermişdir.
Bölmənin digər xəbərləri
