İctimai-Siyasi Sənədlər Arxivində Ulu Öndərin anım günü ilə əlaqədar tədbir keçirilib VİDEO
Bakı, 11 dekabr, AZƏRTAC
Azərbaycan Respublikası Prezidentinin İşlər İdarəsinin İctimai-Siyasi Sənədlər Arxivində Ulu Öndər Heydər Əliyevin vəfatının 20-ci ildönümü ilə əlaqədar anım tədbiri keçirilib.
AZƏRTAC xəbər verir ki, əvvəlcə İctimai-Siyasi Sənədlər Arxivinin inzibati binasında Ulu Öndər Heydər Əliyevin büstü önünə gül dəstələri düzülərək, dünyaşöhrətli siyasi xadimin əziz xatirəsi bir dəqiqəlik sükutla yad edilib.
Sonra Arxivin foyesində tədbir iştirakçılarına İctimai-Siyasi Sənədlər Arxivində mühafizə olunan, Ulu Öndərin şərəfli həyat yolunu və genişmiqyaslı fəaliyyətini əks etdirən qiymətli sənəd, fotoşəkil və nəşrlərdən ibarət sərgi nümayiş olunub.
Arxivin bələdçiləri qonaqlara “Şanlı tariximizin qızıl səhifələri”, “Beynəlxalq Astronavtika Konqresi”, “Azərbaycan-Türkiyə qardaşlığı”, “Qarabağ Azərbaycandır!” adlı stendlərin şərhini verərək, Ümummilli Liderin Azərbaycana rəhbərliyi illərində əldə olunmuş nailiyyətlərə, o dövrün əsas hadisələrinə qısa ekskurs ediblər.
Tədbirdə Ümummilli Lider Heydər Əliyevin xatirəsi bir dəqiqəlik sükutla yad edildikdən sonra Azərbaycan Respublikası Prezidentinin İşlər İdarəsinin İctimai-Siyasi Sənədlər Arxivinin direktoru Elmira Ələkbərova “Heydər Əliyev və 1969-1982-ci illərdə Azərbaycanın neft strategiyası” adlı məruzə ilə çıxış edib. E.Ələkbərova bildirib ki, bu il dünyaşöhrətli siyasi xadim, Azərbaycan xalqının Ümummilli Lideri Heydər Əliyevin anadan olmasının 100, vəfatının 20-ci ildönümü qeyd olunur. 2023-cü ilin başlanğıcından etibarən istər respublika daxilində, istərsə də respublikadan xaricdə Ümummilli Liderin əziz xatirəsinə həsr olunmuş çoxsaylı tədbirlər keçirilib, bütün Azərbaycan xalqı tariximizdə müstəsna yeri olan dahi rəhbərin əziz xatirəsini ehtiramla yad edib.
Ulu Öndərin adının, siyasətinin və dəst-xətinin əbədiyaşar ideologiyaya çevrildiyini vurğulayan E.Ələkbərova qeyd edib ki, Heydər Əliyevin öz xalqını güclü, əzəli torpaqlarımızı azad görmək arzusu dövlətimizin əsas siyasi kursuna işıq salan mayak olub. Prezident İlham Əliyev uzun illər işğal altında olan torpaqları azad etməklə Heydər Əliyevin ən böyük arzusunu gerçəkləşdirib, 30 illik erməni işğalına, məcburi köçkünlərin intizarına, yurd həsrətinə son qoymaqla ata vəsiyyətini layiqincə yerinə yetirib.
Elmira Ələkbərova çıxışının sonunda bildirib ki, İctimai-Siyasi Sənədlər Arxivi 2023-cü ilə yeni nəşrlə - “Heydər Əliyev və 1969-1982-ci illərdə Azərbaycanın neft strategiyası” adlı toplu ilə yekun vurur, bu toplu ilə yeni bir layihənin də təməlini qoymuş olur. Qeyd edilib ki, yeni layihə çərçivəsində Azərbaycan xalqının dahi oğlu və qürur mənbəyi olan Heydər Əliyevin ölkəmizin gələcək inkişafına yönəlmiş yorulmaz fəaliyyətini əks etdirən qiymətli sənədlərdən ibarət bir neçə tematik toplunun nəşri nəzərdə tutulub ki, növbəti illərdə ictimaiyyətə təqdim ediləcək.
Daha sonra “Modern İnkişaf və Ailə” İctimai Birliyinin sədri, YAP Veteranlar Şurasının üzvü Zərifə Quliyeva, YAP Veteranlar Şurasının üzvü, fizika elmləri doktoru, professor Adilə Abbasova çıxış edərək, Ulu Öndərlə bağlı xatirələrini bölüşüblər.
Tədbirin sonunda İctimai-Siyasi Sənədlər Arxivində mühafizə olunan 1969-1982-ci illərə aid qiymətli sənədlər əsasında hazırlanmış, Ulu Öndər Heydər Əliyevin şərəfli ömür yolundan bəhs edən “Quruculuq salnaməsi. Başlanğıc...” adlı sənədli xronika nümayiş etdirilib.
Bölmənin digər xəbərləri
