Handpan ifaçısı: İfa etdiyim melodiyaları ərş adlandırıram VİDEO
Bakı, 8 may, AZƏRTAC
Bəzən bir musiqi alətinin səsi insanı sözlərin çatmadığı duyğulara aparır. Handpan da məhz belə alətlərdəndir - sakitliyi, ritmi və ruhu bir araya gətirən sehrli bir ahəng. Handpan 2000-ci illərdə meydana çıxan nisbətən yeni musiqi alətidir və bu gün hələ də öz auditoriyasını formalaşdırma mərhələsindədir. “Gənc” olmasına baxmayaraq, o artıq meditativ, terapevtik və hətta “kosmik” səslənməsi ilə seçilən bir alət kimi qəbul olunur.
AZƏRTAC-ın müxbirləri həmin sehrin arxasında duran ifaçı – Elrein Amanla handpanın sirli dünyasına səyahət ediblər.
- Elrein, handpanla ilk tanışlığınız necə oldu?
- Bu, təxminən 2018–2019-cu illərdə baş verdi. “YouTube” platformasında bir video gördüm: iki xanım çıxış edirdi — həm DJ idilər, həm də eyni zamanda handpan ifa edirdilər. Mən ilk dəfə həmin anda bu səsi eşitdim… və çox təsirləndim. Bundan sonra marağım yarandı və zamanla bu maraq ciddi bir məşğuliyyətə çevrildi.
- Bu alətdə ifa etmək sizin üçün nə deməkdir?
- Handpanda ifa etdiyim melodiyaları mən xüsusi bir hal kimi hiss edirəm. Mən bunu ərş adlandırıram - sanki daha ali bir məkan, yüksək bir səviyyə… İfa etdiyim zaman həqiqətən də özümü başqa bir ölçüdə hiss edirəm. Amma burada təkcə hisslər deyil, texnika da çox vacibdir. Hiss olmadan musiqi boş qalır, texnika olmadan isə o hissləri çatdırmaq mümkün deyil. Hər şey balans üzərində qurulub.
- Niyə handpan terapevtik alət hesab olunur?
- Çünki o, insanı həqiqətən sakitləşdirir. Onun səsi insanı daxili sükuta, düşüncəyə aparır. Əlbəttə, təkcə handpan deyil, piano və digər musiqi alətləri də terapiyada istifadə oluna bilər. Amma handpanın özünəməxsus dərinliyi var. O, insanı sanki yumşaq şəkildə “dayandırır” və özünü hiss etməyə imkan verir.
- Harada ifa etmək sizin üçün daha rahatdır?
- Mənim üçün bunun fərqi yoxdur. Qapalı məkanda da, səhnədə də, təbiətdə də ifa edə bilərəm. Əsas olan daxili haldır. Harada olmağımdan asılı olmayaraq, mən sadəcə hisslərimi musiqiyə çevirirəm.
- Sizin ifa tərziniz daha çox improvizasiyadır, yoxsa hazırlıq?
- Handpan ilk növbədə improvizasiya alətidir. Mən adətən əvvəlcədən hansı ritmi ifa edəcəyimi planlaşdırmıram — hər şey anın içində yaranır. Amma elə tədbirlər olur ki, hazırlıq tələb olunur. O zaman kompozisiyaları əvvəlcədən düşünürəm. Hər iki halda da musiqinin dərinliyinə enmək mümkündür, amma improvizasiya daha canlı və təbii olur.
- Dinləyicilər sizin musiqiyə necə reaksiya verirlər?
-Yerli vətəndaşlar bəzən sadəcə maraqlı bir alət kimi baxıb keçirlər. Xarici dinləyicilər isə daha çox dayanıb dinləyir, maraqlanırlar. Məncə, bu, zamanla bağlıdır. Handpan hələ çox yeni alətdir və insanlar onu tədricən qəbul edəcəklər. Mən artıq indi də çox gözəl, isti reaksiyalar alıram.
- AZƏRTAC üçün xüsusi mahnı ifa edə bilərsinizmi?
- Bəli, AZƏRTAC üçün xüsusi bir kompozisiya ifa etməkdən məmnun olaram.
Handpandan yüksələn melodiyalar sanki sakit bir axşam küləyi kimi məkanı bürüdü. Hər ritm insanın daxilinə toxunan incə bir duyğu, hər ahəng isə ruhu dincəldən bir pıçıltı təsiri bağışlayırdı. Musiqinin axarı gah dalğaların sakit ritmini xatırladır, gah da insanı xəyallar aləminə aparan mistik bir səfərə çevirirdi. İfa boyunca səslər bir-birinə elə ahənglə qovuşurdu ki, zaman sanki yavaşlayırdı, dinləyənlər isə yalnız melodiyanın sehrində yaşayırdılar...
Bölmənin digər xəbərləri
