“Savalan” qəzetinin 70 yaşı tamam olur.

AZƏRTAC-ın müxbiri yubilyar qəzetin redaktorunun müavini, əməkdar mədəniyyət işçisi, qabaqcıl maarif xadimi, “Qızıl qələm” və digər media mükafatlarının sahibi Akif Quliyevdən 70 illik yol barədə danışmağı xahiş etmişdir. A.Quliyev demişdir:

-Qəzet 1938-ci il avqustun 1-də “Azərbaycan pioneri” adı ilə Azərbaycan komsomolu Mərkəzi Komitəsinin orqanı kimi nəşrə başlamışdır. 1990-cı ildə ona cənubi və şimalı azərbaycanlıların ucalıq zirvəsi, qüdrət rəmzi olan Savalan dağının adı verilmişdir.

İlk dövrlərdə qəzetin redaktoru M.Əliyev, sonralar Q.Həsənov, İ.Novruzov olmuşlar. 1946-cı ilin mayından tanınmış uşaq yazıçısı Eynulla Ağayev redaktor təyin olunmuş və iyirmi ilə yaxın bu vəzifədə çalışmışdır. Onun əvəz edən Əmrah Əmrahovun da redaktorluğu uzunmüddətli - 22 il olmuşdur. Qəzetdə gözəl şairlərimiz Hikmət Ziya, Tofiq Mütəllibov, Vaqif Nəsib, yazıçı-fantast Emin Mahmudov, yazıçı-publisist Əli Səmədov və Əmir Mustafayev kimi ziyalılar çalışmışlar. Zeynal Cabbarzadə, Hüseyn Abbaszadə, Nəriman Süleymanov, Məmməd Araz, Nəriman Həsənzadə, Aqşin Babayev, Eldar Baxış, Tofiq Mahmud, Fikrət Qoca, İlyas Tapdıq kimi tanınmış şair və yazıçılar redaksiya heyətinin üzvləri olmuş, qəzetimizin ən çox oxunan və sevilən müəllifləri kimi yaddaşlarda qalmışlar. Səkkiz ildir ki, qəzetə Azərbaycan Gənclər İttifaqı sədrinin müavini, Uşaq və Gənclərin Xeyriyyə Fondunun sədri Eldar Əliyev rəhbərlik edir.

Mətbu orqanın fəaliyyət göstərdiyi bütün illər ərzində onun əsas qayəsi, məqsədi və vəzifəsi gənc nəslə xidmət göstərmək, onların Vətənin layiqli övladları kimi yetişmələrinə kömək göstərmək olmuşdur. “Savalan” bir çox tədbirlərin təşəbbüsçusü və təşkilatçısı olmuşdur. Bir vaxtlar respublikamızda son dərəcə şöhrət tapmış “Sevinc” futbol klubu 1964-cü ildən 1990-cı ilə kimi - 25 il fəaliyyət göstərmişdir. Yeri gəlmişkən, qəzetin 70 illiyi mənim üçün ikiqat bayramdır. Belə ki, bu il mənim həmin qəzetdə işləməyimin 45 ili tamam olur.

Məktəblilərin xalqımızın qəhrəman övladlarını yaxından tanıması çox mühüm məsələdir. Vətənpərvərlik, Vətənə, ana torpağa sədaqət və məhəbbət hissləri aşılayan yazıları dərc etməklə uşaqlara, yeniyetmələrə bir daha xatırladırıq ki, nikbin olmaq, cəsur babaları ilə fəxr etmək, qürurlanmaq, böyük öndər Heydər Əliyevin qüdrətləndirdiyi, şöhrətləndirdiyi, bütün dünyaya tanıtdığı müstəqil Azərbaycanımızın layiqli övladları olmaq onların borcudur. Gənc Vətən övladları qürur hissi ilə, fəxrlə “Heydər baba” adlandırdıqları dühanın hər tərəfə şölə saçan işığının izi ilə gedir, rəhbərə həsr etdikləri şeir və hekayələri ilə, uşaq təxəyyülünün məhsulu olan yazıları ilə bizə öz müjdələrini bəxş edirlər. Onlar bilirlər ki, el sərkərdəsinin Vətəni, xalqı üçün alovlandırdığı bu sönməz məşəl zəfərlərlə zəngin olan Heydər Əliyev yolunun böyük davamçısı, onun qələbə estafetini əzmlə irəli aparan Prezidentimiz İlham Heydər oğlu Əliyevin əlindədir.