“Abşeron“ qəzetinin 5 mininci nömrəsi çapdan çıxıb
Xırdalan, 12 mart, Ətrabə Rzayeva, AZƏRTAC
“Abşeron“ qəzetinin 5 mininci nömrəsi çap olunub. Bu münasibətilə Xırdalan şəhərindəki Heydər Əliyev Mərkəzində tədbir keçirilib.
AZƏRTAC xəbər verir ki, Abşeron Rayon İcra Hakimiyyətinin başçısı İradə Gülməmmədova qəzetin kollektivini 5 mininci nömrənin nəşri münasibətilə təbrik edib, onlara yeni yaradıcılıq uğurları arzulayıb.
“Abşeron" qəzetinin baş redaktoru Elimxan Mehrəliyev bildirib ki, qəzet 1962-ci ildə Azərbaycan Kommunist Partiyası Mərkəzi Komitəsinin və Azərbaycan SSR Nazirlər Sovetinin rayonlararası mətbu orqanı kimi Abşeron, Dəvəçi (indiki Şabran), Xızı və Siyəzən rayonlarının əraziləri də daxil olmaqla, bölgələrin sosial-siyasi və iqtisadi həyatını işıqlandırmaq məqsədilə təsis olunub. 1998-ci ilin yanvarından etibarən Abşeron Rayon İcra Hakimiyyətinin qəzeti kimi müntəzəm olaraq rayonun ictimai-siyasi həyatını işıqlandırır, 2000-2500 tirajla çıxır. Qəzet 1962-ci ildən bəri “Azərbaycan” nəşriyyatının mətbəəsində çap olunur.
Çıxışlarda ölkə jurnalistlərinin sosial vəziyyətinin yaxşılaşdırılması və digər istiqamətlərdə həyata keçirilən layihələr barədə də ətraflı məlumat verib. Bildirilib ki, Azərbaycanda söz və mətbuat azadlığı sahəsində mühüm nailiyyətlər əldə olunub.
Sonda qəzetin baş redaktoru rayon icra hakimiyyətinin fəxri fərmanı ilə təltif edilib.
Bölmənin digər xəbərləri
