İQTİSADİYYAT
Ağır sənaye və maşınqayırma müəssisələri üçün enerjidən səmərəli istifadə ilə bağlı metodik vəsait hazırlanıb
Bakı, 25 iyul, AZƏRTAC
Energetika Nazirliyində İqtisadiyyat Nazirliyi, İqtisadi İslahatların Təhlili və Kommunikasiya Mərkəzi, “Azərişıq” ASC, eləcə də ağır sənaye və maşınqayırma müəssisələrinin nümayəndələrinin iştirakı ilə “Azərbaycan Respublikasında ağır sənaye və maşınqayırmanın inkişafına dair Strateji Yol Xəritəsi”nin “Enerji istehlakçılarının enerjidən səmərəli istifadəyə yönləndirilməsi” bəndinin icrası ilə bağlı müzakirələr aparılıb.
Nazirlikdən AZƏRTAC-a bildirilib ki, tədbirdə müvafiq bənd üzrə ağır sənaye və maşınqayırma müəssisələri üçün enerjidən səmərəli istifadə ilə bağlı Energetika Nazirliyi və “Azərişıq” ASC tərəfindən hazırlanmış metodik vəsaitin təqdimatı keçirilib.
Energetika nazirinin müavini Samir Vəliyev davamlı enerjinin əsas komponentlərindən biri olan enerji səmərəliliyinin sənaye müəssisələrində tətbiqi ətraf mühitə təsirlərin azaldılması ilə yanaşı, bu müəssisələrin fəaliyyətində məhsuldarlığa və inkişafa töhfə verəcəyini bildirib. Enerji səmərəliliyi ilə bağlı məsələlərin həllini tapması, zəruri texniki və maliyyə dəstəyinin təmin edilməsi üçün hüquqi bazanın yaradılmasının vacibliyini vurğulayan nazir müavini deyib ki, hazırda “Enerji resurslarından səmərəli istifadə və enerji effektivliyi haqqında” qanun layihəsi baxılmaqdadır.
S.Vəliyev, həmçinin Beynəlxalq Bərpaolunan Enerji Agentliyi (IRENA), Beynəlxalq Enerji Agentliyi (IEA) kimi beynəlxalq qurumların təhlilləri və qabaqcıl təcrübəyə əsaslanaraq hazırlanmış bu metodiki vəsaitin enerji istehlakçılarının enerjidən səmərəli istifadəyə yönləndirilməsinə müsbət təsir edəcəyini və tövsiyə xarakterli belə materialların 2020-ci ildə də hazırlanacağını diqqətə çatdırıb.
Sonra “Azərişıq” ASC-nin Tədris Mərkəzinin direktoru Araz Məmmədzadə kitabçada əksini tapmış enerji səmərəliliyi, onun faydaları, enerji səmərəliliyi indeksi, sənaye sektorunda enerji səmərəliliyində öncəlik, enerjiyə olan tələbatın idarə edilməsi, enerji səmərəliliyini idarəetmə sistemləri, enerjiyə qənaət tədbirləri, sənaye müəssisələrində səmərəliliyin imkanları ilə bağlı təkliflər və tövsiyələrə dair geniş təqdimatla çıxış edib.
İqtisadi İslahatların Təhlili və Kommunikasiya Mərkəzinin nümayəndəsi Faiq Qasımlı Strateji Yol Xəritəsi çərçivəsində görülən bu işləri yüksək qiymətləndirib və sənaye müəssisələrində enerji səmərəliliyinin təşviq edilməsi istiqamətində atılan addımlardan bəhs edib. F.Qasımlı belə tədbirlərdən biri kimi Azərbaycan Respublikası Nazirlər Kabinetinin 2019-cu il 4 iyun tarixli Qərarı ilə təsdiq edilmiş “Paylarının (səhmlərinin) nəzarət zərfi dövlətə məxsus olan hüquqi şəxslərin fəaliyyətinin səmərəliliyinin qiymətləndirilməsi” Qaydasını və burada səmərəlilik göstəricilərinə görə bonusların nəzərdə tutulduğunu qeyd edib.
Tədbirdə təqdimatda qeyd olunan istiqamətlər üzrə müzakirələr aparılıb, rəy və təkliflər dinlənilib.