MƏDƏNİYYƏT
Azərbaycanın ''Aypara'' muğam qrupu Beynəlxalq müsabiqənin qalibi olmuşdur
Bakı, 28 mart (AZƏRTAC). Daşkənddən- Azərbaycan-Özbəkistan dövlətlərinin dostluq konsertindən iki diplomla qayıdan ''Aypara'' muğam qrupu daha sonra martın 22-dən 26-dək Rusiyanın Çita şəhərində keçirilmiş milli alətlər orkestrləri və ansambllarının Beynəlxalq müsabiqəsinə videobağlantı vasitəsilə qatılmışdır.
Martın 27-də qrupun üzvü Pərviz Fərhadovun elektron poçtuna daxil olan məlumatda “Aypara”nın bu mötəbər müsabiqənin qalibi olduğu bildirilir.
''Aypara'' muğam qrupundan AZƏRTAC-a bildirmişlər ki, müsabiqədə Belarus, Ukrayna, Çin, Rusiya və digər ölkələrdən 60-dan çox kollektiv və 900-dən artıq musiqiçi iştirak etmişdir.
“Aypara” muğam qrupunun tərkibinə II Respublika muğam müsabiqəsinin (2011-ci il) qalibi, xanəndə Aytən Məhərrəmova, Muğam Televiziya Müsabiqəsinin (2007-ci il) laureatı, xanəndə Vüsal Zamanov, 2012-ci ildə keçirilmiş VII Beynəlxalq “Avrasiya səsləri '' festivalının qalibləri Ədalət Behbudov (tar) və Pərviz Fərhadov (kamança), eləcə də Ədalət & Pərvizin rəhbərlik etdiyi "Aypara '' instrumental ansamblının üzvləri Ruhulla Dadaşov (nağara), Humay Rəhimova (qanun), Kamran Nəsirov (klaviş) və Xəyyam Bünyadov (ud) daxildirlər.