Naxçıvan, 19 fevral, AZƏRTAC

Hər bir xalqı, milləti başqalarından fərqləndirən mühüm amillərdən biri və ən başlıcası onun dilidir. Azərbaycan dili də özünəməxsus zənginliyi ilə başqa dillərdən seçilir.

AMEA Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, Beynəlxalq Ana Dili Gününə həsr olunan “Dilimizin saflığının qorunması hər bir vətəndaşın borcudur” mövzusunda keçirilən konfransda bu fikirlər səsləndirilib.

Konfransda çıxış edən bölmənin sədri, akademik İsmayıl Hacıyev dilin cəmiyyətin həyatında əhəmiyyəti və ana dilimizə göstərilən dövlət qayğısından danışıb. “Hər bir milləti yaşadan onun dilidir, dil insanın milli şüurunu formalaşdırır”,- deyən akademik dilimizin lüğət tərkibinin ilbəil genişlənməsi, söz yaradıcılığı sahəsindəki bəzi dəyişikliklər və digər mövzulara toxunub.

AMEA Naxçıvan Bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Vətən müharibəsi dövründə Prezident İlham Əliyevin müsahibə və müraciətlərində ana dili məsələləri” mövzusunda məruzə edib. Əvvəlcə 21 fevral tarixinin Beynəlxalq Ana Dili Günü kimi qəbul edilməsinin tarixi əsaslarından bəhs edən məruzəçi qeyd edib ki, bu əlamətdar günün təsis olunması dilin qorunması, yaşadılması istiqamətində atılmış uğurlu addımdır.

“Azərbaycan xalqının erməni işğalçılarına qarşı qırx gündən artıq davam edən müzəffər hərbi, ictimai, siyasi mübarizəsində Ali Baş Komandan İlham Əliyevin xalqa müraciətləri, dünyanın müxtəlif nüfuzlu kütləvi informasiya vasitələrinə verdiyi müsahibələr son dərəcə mühüm rol oynadı”,- deyən Əbülfəz Quliyev diqqətə çatdırıb ki, sözügedən müsahibə və müraciətlər milli birliyimizi mənəvi qüvvəyə çevirməklə öz tarixi missiyasını uğurla yerinə yetirdi.

Vurğulanıb ki, ölkə başçısının Vətən müharibəsi dövründə etdiyi müraciət və çıxışları dəqiqliyi, məntiqi ardıcıllığı ilə bərabər, xalq danışıq dilinə yaxınlığı, təravətli leksikonu, qəlbə nüfuz edən frazeologizmləri, qüdrətli intonasiyası ilə Azərbaycan xalqını dəmir yumruq ətrafında birləşdirdi. Mürəkkəb hadisələrin, gərgin proseslərin mahiyyətini böyük analitik istedadla şərh edən, Azərbaycan xalqının iradəsinin parlaq ifadəsi olan çıxışlar, heç şübhəsiz, dilimizin ən mötəbər mənbələrindən biri kimi tarixə yazıldı.

Naxçıvan Muxtar Respublikası Yazıçılar Birliyinin sədri, Əməkdar mədəniyyət işçisi Asim Yadigar “Ən böyük milli dəyərimiz - ana dilimiz” adlı məruzəsində orta əsrlər dövründən bu günədək dilimizin keçdiyi tarixi inkişaf yolu, onun səlisliyi və təmizliyi məsələləri ilə bağlı fikirlərini bölüşüb. Daha sonra İzzəddin Həsənoğlu və onun ardıcıllarının timsalında Azərbaycan dilinin canlanması, zənginləşməsi və işləkləşməsi məsələlərinə diqqət çəkən məruzəçi ana dilimiz haqqında əsərlər yaradan söz ustadlarından bəhs edərək, onların yaradıcılığından bədii nümunələr səsləndirib.

Bölmənin İncəsənət Dil və Ədəbiyyat İnstitutunun əməkdaşları, filologiya üzrə fəlsəfə doktoru, dosent Nuray Əliyeva “Dilimiz tarixi yaddaşımızdır” mövzusunda məruzəsində başqa dillərdən alınan sözlər hesabına dilin zənginləşdirilməsi problemindən bəhs edib, son dövrlər dilimizdə ümumişləklik qazanmış sözlərdən, onun saflığının qorunması məsələlərindən danışıb. Filologiya üzrə fəlsəfə doktoru, dosent Zülfiyyə İsmayıl isə “Dövlətçilik və dil məsələləri” mövzusunda məruzəsində doğma dilimizə layiq olduğu dəyərin hələ XVI əsrdə Şah İsmayıl Xətai tərəfindən verildiyini diqqətə çatdırıb. Bildirib ki, heç bir dil dövlət qayğısı olmadan inkişaf edə bilməz. Dil bütün dəyərləri qoruyub saxlayan, nəsildən-nəslə ötürən, hər bir xalqın milliliyini, mənəvi dəyərlərini yaşadan, inkişaf etdirən ən dəyərli sərvətimizdir.