MƏDƏNİYYƏT
“Gəncənin səsi” qəzetinin 90 illiyi qeyd edilmişdir
Gəncə, 9 dekabr (AZƏRTAC). Respublikamızda ən qocaman mətbu orqanı olan “Gəncənin səsi” şəhər qəzetinin 90 yaşı tamam olmuşdur.
Bu münasibətlə Azərbaycan Dövlət Aqrar Universitetinin akt zalında təntənəli yubiley mərasimi keçirilmişdir.
Gəncə Şəhər İcra Hakimiyyəti başçısının müavini Akif Ələkbərov qəzetin tarixindən, onun təbliğatçılıq, təşviqatçılıq, eləcə də təşkilatçılıq missiyasından danışmışdır. Natiq 1920-ci ildə “Qırmızı Gəncə” adı ilə nəşrə başlayan, sonralar “Zərbə”, “Kirovabad bolşeviki”, “Kirovabad fəhləsi”, “Kirovabad kommunisti” və nəhayət, “Gəncənin səsi” adı ilə fəaliyyət göstərən qəzetin redaksiya kollektivinə gərgin və şərəfli işlərində uğurlar arzulamışdır.
Sonra Azərbaycan Dövlət Aqrar Universitetin rektoru, professor Mirdamət Sadıqov çıxış edərək şəhərdəki ali təhsil müəssisələrində çalışan alimlərin sevimli tribunası olduğunu diqqətə çatdırmış və redaksiyanın fəaliyyətinə alimlərin töhfəsi olaraq bir dəst kompyuter hədiyyə etmişdir.
Yeni Azərbaycan Partiyası Gəncə şəhər təşkilatının sədri, professor İsrafil İsmayılov, AMEA-nın müxbir üzvü Fuad Əliyev və başqaları çıxış edərək yubiley münasibətilə redaksiya kollektivinə ən xoş arzularını bildirmişlər.
Qəzetin baş redaktoru, yazıçı-jurnalist Rəfiqə Sadıqova onların əməyinə verdikləri qiymətə görə ölkə başçısına və şəhər rəhbərliyinə minnətdarlıq etmişdir.
Yubiley tədbiri musiqi kollektivlərinin rəngarəng konsert proqramı ilə başa çatmışdır.