Karikaturaçı rəssamların Beynəlxalq müsabiqəsinə yekun vurulmuşdur
Bakı, 9 dekabr (AZƏRTAC). Azərbaycan Karikaturaçı Rəssamlar Birliyinin, Səhiyyə Kommunikasiyası Assosiasiyası və Fransanın Azərbaycandakı səfirliyinin birgə təşkilatçılığı ilə “Tütünçəkmənin zərərləri - karikaturaçı rəssamların gözü ilə” Beynəlxalq karikatura müsabiqəsinə yekun vurulmuşdur.
Karikaturaçı Rəssamlar Birliyinin mətbuat xidmətindən AZƏRTAC-a bildirmişlər ki, müsabiqəyə 60-a yaxın rəssam qatılmışdır. Münsiflər heyətinin qərarına əsasən, I yerə tanınmış karikatura ustası Vəfa Allahyarova, II, III yerlərə və müsabiqənin xüsusi mükafatlarına isə əsasən gənc rəssamlar layiq görülmüşlər.
Müsabiqədə, həmçinin Türkiyədən, İrandan, Rusiyadan, Niderlanddan da rəssamlar iştirak etmişlər. Türkiyəli rəssam İsmayıl Kar müsabiqənin həvəsləndirici mükafatını qazanmışdır.
Müsabiqənin yekun sərgisi və qaliblərin mükafatlandırılması mərasimi dekabrın 10-da Bakıdakı Fransa Mədəniyyət Mərkəzində olacaqdır.
Bölmənin digər xəbərləri
