ABŞ patrul təyyarəsi İran yaxınlığında kəşfiyyat uçuşu həyata keçirib
Bakı, 9 fevral, AZƏRTAC
Bazar günü ABŞ Hərbi Dəniz Qüvvələrinə məxsus “P-8A Poseidon” sualtı qayıq əleyhinə patrul təyyarəsi İran yaxınlığında, Körfəz üzərində kəşfiyyat uçuşu həyata keçirib.
AZƏRTAC xəbər verir ki, bu barədə “Flightradar24” aviasiya resursunun məlumatlarında deyilir.
Məlumata görə, təyyarə Bəhreyndə yerləşən aviabazadan havaya qalxıb. Çoxsaatlıq uçuş zamanı “P-8A Poseidon” mərkəzi Körfəzdəki beynəlxalq sular üzərindən keçərək, Bəhreynin şimal hissəsindən Birləşmiş Ərəb Əmirlikləri istiqamətində hərəkət edib.
Qeyd olunur ki, bu tip Amerika patrul təyyarələri müntəzəm olaraq Hörmüz boğazı, Körfəz və Oman körfəzi ərazisindəki vəziyyətin monitorinqi üçün istifadə olunur.
Bölmənin digər xəbərləri
