Azərbaycanın xarici siyasətində Türk dünyası prioritet təşkil edir – ŞƏRH
Bakı, 19 sentyabr, AZƏRTAC
Prezident İlham Əliyev Türk Dövlətləri Təşkilatına (TDT) üzv ölkələrin təhlükəsizlik üzrə rəhbər şəxslərini qəbul edərkən olduqca vacib məqamlara toxunub. Bu mənada dövlətimizin başçısının əməkdaşlıq və təhlükəsizlik məsələlərinə dair çıxışı Azərbaycanın Türk dünyasında həyata keçirdiyi siyasətin əsas istiqamətlərini və TDT-nin qarşıdakı dövr üçün prioritetlərini əhatə edir. Çıxışda Azərbaycanın təşkilat daxilində təşəbbüskar və etibarlı tərəfdaş kimi rolu, siyasi və iqtisadi əlaqələrin genişləndirilməsi, enerji və nəqliyyat təhlükəsizliyinin gücləndirilməsi, eləcə də müasir təhlükəsizlik çağırışlarına qarşı birgə fəaliyyət məsələləri ön plana çəkilib.
Bunu AZƏRTAC-a açıqlamasında YAP Təftiş Komissiyasının sədri, Milli Məclisin deputatı Sevinc Hüseynova deyib.
O qeyd edib ki, Bakıda qısa müddət ərzində TDT-yə üzv dövlətlərinin dini liderlərinin, ardınca isə Təhlükəsizlik Şuralarının katiblərinin yüksəksəviyyəli toplantılarının keçirilməsi Azərbaycanın təşkilat çərçivəsində mühüm əməkdaşlıq platforması kimi rolunu nümayiş etdirir: “Həmin tədbirlər Azərbaycanın siyasi, humanitar və təhlükəsizlik sahələrində Türk dövlətləri arasında dialoqun inkişafına verdiyi töhfənin göstəricisidir. TDT-nin strateji məqsədlərindən biri beynəlxalq nüfuzunun və təsir imkanlarının artırılması, təşkilatın aparıcı beynəlxalq platformalardan birinə çevrilməsidir. 2009-cu ildə Naxçıvanda keçirilmiş Zirvə görüşündən sonra təşkilat üzv dövlətlər arasında siyasi, iqtisadi, mədəni və humanitar əlaqələrin inkişaf etdirilməsi istiqamətində mühüm fəaliyyət həyata keçirib. Dövlət başçıları arasında təmasların intensivləşdirilməsi bu prosesin mühüm istiqamətlərindən biridir. Azərbaycanın təşəbbüsü ilə qeyri-rəsmi Zirvə görüşlərinin keçirilməsinə başlanılması da TDT daxilində daha çevik siyasi dialoqun formalaşdırılmasına xidmət edir.
Eyni zamanda, enerji və nəqliyyat bağlantıları TDT-nin strateji əhəmiyyətini artıran əsas amillərdəndir. Geniş coğrafiyada yerləşən üzv dövlətlər mühüm enerji ehtiyatlarına və nəqliyyat imkanlarına malikdirlər. Azərbaycan isə Mərkəzi Asiya ilə Avropa arasında mühüm tranzit ölkə kimi çıxış edir. Xəzər dənizi üzərindən keçən nəqliyyat marşrutlarının inkişafı və enerji layihələrinin genişləndirilməsi üzv dövlətlərin beynəlxalq bazarlara çıxış imkanlarını artırmaqla yanaşı, regional iqtisadi əməkdaşlığın dərinləşməsinə də şərait yaradır”.
Deputat bildirib ki, Azərbaycanın xarici siyasətində Türk dünyası prioritet təşkil edir: “Prezident İlham Əliyevin “Türk dünyası bizim ailəmizdir və bizim başqa ailəmiz yoxdur” fikri bu siyasətin mahiyyətini aydın şəkildə ifadə edir. TDT üzv dövlətləri ilə həm çoxtərəfli, həm də ikitərəfli münasibətlərin inkişaf etdirilməsi bu yanaşmanın mühüm tərkib hissəsidir. Türkiyə, Qazaxıstan, Qırğızıstan və Özbəkistanla müttəfiqlik münasibətlərinin inkişafı, eləcə də birgə investisiya fondlarının yaradılması siyasi və iqtisadi əlaqələrin möhkəmləndirilməsinə xidmət edir.
Sözsüz ki, müasir dövrdə təhlükəsizlik anlayışı yalnız hərbi təhdidlərlə məhdudlaşmır. Regional münaqişələr, informasiya müharibələri, dezinformasiya və ideoloji təsirlər də dövlətlərin təhlükəsizlik gündəliyində mühüm yer tutur”.
Sevinc Hüseynova vurğulayıb ki, bu baxımdan TDT üzv dövlətləri arasında təhlükəsizlik sahəsində əməkdaşlığın və informasiya mübadiləsinin gücləndirilməsi aktual məsələlərdəndir: “Cəmiyyətlərin xarici ideoloji təsirlərə və dezinformasiyaya qarşı dayanıqlığının artırılması, xüsusilə gənclərin informasiya savadlılığının yüksəldilməsi bu sahədə mühüm istiqamətlər kimi nəzərdən keçirilir. Bu mənada TDT-nin siyasi, iqtisadi, enerji, nəqliyyat və təhlükəsizlik sahələrində əməkdaşlığın daha da dərinləşdirilməsi üçün geniş imkanlara malikdir. Azərbaycanın təşkilat çərçivəsində təşəbbüsləri, əlverişli coğrafi mövqeyi, nəqliyyat və enerji imkanları, eləcə də Türk dövlətləri ilə inkişaf edən ikitərəfli münasibətləri onun TDT daxilindəki rolunun çoxşaxəli xarakterini müəyyən edir. Bu istiqamətlər üzrə əməkdaşlığın davam etdirilməsi Türk Dövlətləri Təşkilatının beynəlxalq mövqeyinin və üzv dövlətlər arasında qarşılıqlı əlaqələrin daha da möhkəmlənməsinə xidmət edir”.
Müxbir - Göyçək Mahmudlu
Bölmənin digər xəbərləri
