“Goldman Sachs” neft qiymətləri ilə bağlı proqnozunu artırıb
Bakı, 2 noyabr, AZƏRTAC
ABŞ-nin qabaqcıl investisiya banklarından olan “Goldman Sachs” neft təchizatı ilə bağlı risklərin artması fonunda cari ilin sonu və 2027-ci il üçün neft qiymətlərinə dair proqnozlarını yüksəldib.
AZƏRTAC xəbər verir ki, bankın analitikləri “Brent” markalı xam neftin bir barelinin qiymətinin dekabr ayında əvvəlki 90 dollar proqnozla müqayisədə 105 dollara çatacağını, 2027-ci ildə isə orta hesabla 88 dollar təşkil edəcəyini bildiriblər. Bu, əvvəlki proqnozla müqayisədə 10 faizlik artım deməkdir. “Light” markalı xam neftin qiymət proqnozları da artırılıb.
Analitiklər bildiriblər ki, təchizatla bağlı risklərin ciddi şəkildə azalması qısamüddətli perspektivdə neft qiymətlərində yüksək risk əlavəsinin qorunmasına səbəb ola bilər. Bazar iştirakçıları noyabrın 3-də ABŞ-də keçiriləcək aralıq seçkilərdən sonra gərginliyin artması və bunun Yaxın Şərqdən neft təchizatının azalmasına səbəb ola biləcəyi ehtimalını getdikcə daha çox nəzərə alırlar.
“Brent”in qiyməti Yaxın Şərqdən xam neft tədarükünün müharibədən əvvəlki səviyyələrə yaxınlaşmasına baxmayaraq, oktyabr ayında 14 faiz artaraq son 6 ayın ən yüksək göstəricisinə çatıb. Bahalaşma ABŞ ilə İran arasında gərginliyin aralıq seçkilərdən sonra yenidən artacağına dair narahatlıqlarla əlaqələndirilir.
ABŞ Prezidenti Donald Tramp hava zərbələrinin yenidən həyata keçirilə biləcəyinə dair dəfələrlə açıqlamalar verib. İranın ali dini lideri isə yüksəkrütbəli hərbi komandanlara mümkün yeni qarşıdurmaya hazırlaşmaq barədə göstəriş verib.
Ekspertlərin fikrincə, dəniz nəqliyyatına qarşı hücumların intensivləşməsi və enerji infrastrukturuna dəyən ziyan neft qiymətlərinin daha da yüksəlməsinə səbəb ola biləcək amillərdəndir. Onlar, həmçinin Rusiyanın Ukraynaya qarşı müharibəsi ilə bağlı risklərə diqqət çəkiblər.
Təchizatda fasilələrin nə zaman və harada baş verəcəyini əvvəlcədən müəyyənləşdirmək demək olar ki, mümkün olmadığından, bankın baza ssenarisinə artıq 2027-ci ildə qlobal neft təchizatında gündəlik 1 milyon barel həcmində azalma ehtimalı da daxil edilib.
Son həftələrdə “Morgan Stanley” bankı da “Brent”in dördüncü rüb üzrə qiymət proqnozunu bir barel üçün 105 dollara yüksəldib. “ANZ Group” da “Brent” markalı neftin fyuçers müqavilələri üzrə ilin sonuna dair proqnozunu eyni səviyyəyə çatdırıb.
Hazırda “Brent”in bir bareli 110 dollar səviyyəsində ticarət olunur.
Bölmənin digər xəbərləri
