Deputat: 28 Maydan 20 Sentyabra uzanan yol Azərbaycanın dövlətçilik iradəsinin tarixidir
Bakı, 19 sentyabr, AZƏRTAC
Azadlığımızı heç də rahat əldə etməmişik. 1991-ci ildə Azərbaycan dövlət müstəqilliyini bərpa etdikdən sonra ölkəmiz az qala 1918-ci ildə Azərbaycan Xalq Cümhuriyyətinin taleyini yenidən yaşayacaqdı. Cərəyan edən proseslər bir daha sübut etdi ki, azadlığı qazanmaq tarixin hadisəsidir, onu qorumaq isə xalqın taleyini müəyyən edən böyük məsuliyyətdir. Müstəqil ölkəmizin ovaxtkı rəhbərliyi bu məsuliyyəti dərk etmədi və nəticə etibarilə torpaqlarımız işğal olundu, tariximizin ən ağır müsibətlərindən olan Xocalı faciəsini yaşadıq. Yarıtmaz dövlət siyasəti xalqın azadlıq arzusu ilə dövlət idarəçiliyi arasındakı uçurumu daha da dərinləşdirirdi. Dövlətin gələcəyi ilə bağlı məsuliyyət hissinin zəifləməsi, siyasi iradənin yoxluğu və milli maraqların arxa plana keçməsi müstəqilliyimizin özülünü sarsıtdı.
Belə bir vəziyyətdə xalqın təkidli tələbi ilə Heydər Əliyev siyasi hakimiyyətə qayıtdı. Ulu Öndərin hakimiyyətə qayıdışı ilə Azərbaycanda dövlətçilik düşüncəsi yenidən siyasi iradənin əsası oldu, itirilmək təhlükəsi ilə baş-başa qalan müstəqilliyimiz möhkəm dayaqlar üzərində yeni mərhələyə qədəm qoydu. Ordusu, silahı olmayan, torpaqları işğal olunan Azərbaycanın siyasi olimpində Heydər Əliyev erası başlandı. Ulu Öndər qurtuluş yoluna qədəm qoyan Azərbaycanın qarşısında dayanan ən ağır vəzifələri ardıcıl şəkildə həll etməyə başladı. Atəşkəsin əldə olunması, ordunun yaradılması, dövlət institutlarının möhkəmləndirilməsi və iqtisadi dayaqların formalaşdırılması ölkəmizin gələcəyinə aparan yolun əsas sütunlarına çevrildi. Azərbaycan dövləti belə quruldu, gələcək hədəflər müəyyənləşdirildi. Ulu Öndər Heydər Əliyev ölkəmizin ərazi bütövlüyünün və suverenliyinin tam bərpasını özü qədər inandığı İlham Əliyevə etibar etdi. Prezident İlham Əliyev bu inamı dövlət iradəsinə, dövlət iradəsini isə tarixi zəfərə çevirən lider kimi Azərbaycanın epoxal manifestini yazdı.
Bu fikirləri AZƏRTAC-a açıqlamasında YAP İdarə Heyətinin üzvü, Milli Məclisin deputatı Rəşad Mahmudov söyləyib. O xatırladıb ki, 44 günlük Vətən müharibəsindən sonra Prezident İlham Əliyev Azərbaycanın heç bir qarış torpağının müzakirə mövzusu ola bilməyəcəyini bəyan etmişdi.
Ali Baş Komandanın rəhbərliyi ilə həyata keçirilən birgünlük antiterror tədbirləri nəticəsində Qarabağda separatizmin və qanunsuz silahlı birləşmələrin fəaliyyətinə son qoyuldu. Azərbaycan Ordusunun peşəkarlığı, yüksək döyüş hazırlığı və qəhrəmanlığı sayəsində düşmənin müqaviməti qırıldı, üçrəngli bayrağımız Xankəndidə ucaldıldı. Bu tarixi hadisə Azərbaycanın beynəlxalq səviyyədə tanınmış ərazi bütövlüyünün və suverenliyinin bütün ölkə ərazisində bərpasını təmin etdi.
Beləliklə, xalqımız uzun illər milli yaddaşımızda yaşayan ən mühüm problemi Prezident İlham Əliyevin liderliyi sayəsində həll etdi. Qarabağda dalğalanan üçrəngli bayraq dövlətimizin gücünü, xalqımızın birliyini və tarixi ədalətin bərpasını bütün dünyaya nümayiş etdirdi.
“Qarabağ Azərbaycandır!” nidası ilə başlayan böyük mübarizə Lider–Xalq vəhdətinin yaratdığı qüdrət və dəmir iradə ilə Azərbaycanın suverenliyinin tam bərpasına gətirib çıxardı. Böyük güclərin himayəsinə arxalanan düşmən bu tarixi iradənin və milli gücün qarşısında pərən-pərən düşdü. Azərbaycan öz ərazi bütövlüyünü və suverenliyini bərpa etməklə tarix qarşısında haqqını, dövlət qarşısında məsuliyyətini, gələcək nəsillər qarşısında müqəddəs borcunu yerinə yetirdi. Dəmir iradənin qələbəsi tariximizin ən şərəfli hadisələrindən biri kimi yaddaşımıza həkk olundu.
Deputatın sözlərinə görə, 28 May azadlığımızın, 15 İyun dövlətçilik iradəmizin, 20 Sentyabr isə həmin tarixi iradənin tam suverenliyə qovuşduğu günün ifadəsidir. Bu tarixlər bir xalqın azadlıq arzusundan dövlətçilik əzminə, dövlətçilik əzmindən ərazi bütövlüyü və suverenlik həqiqətinə uzanan böyük tarixi yolun mühüm mərhələləridir. Ölkəmizin ərazi bütövlüyünün tam bərpa olunması çoxəsrlik tariximizin ən böyük sərkərdəsi Prezident İlham Əliyevin qətiyyəti, siyasi iradəsi və dövlətçilik strategiyası ilə Azərbaycanın tarixi haqqının bərpasına çevrildi. Bu zəfər xalqın yaddaşında qətiyyətin, liderliyin və tarixi ədalətin təntənəsi kimi yaşayacaq. Uzun illər ərzində ölkəmizin daxilində kök salmış separatizmin kökü Prezident İlham Əliyevin böyük sərkərdəliyi ilə kəsildi.
“Həkim kimi qeyd edim ki, şovinizm və separatçılıq, şübhəsiz, yaddaşını itirməyən xroniki xəstəlikdir. “Bölgənin siyasi yaddaşında Prezident İlham Əliyev liderliyi var olduqca bu xəstəliyin yenidən kök salması mümkünsüzdür və sülh silahların susduğu andan başlayır, düşüncələrin dəyişdiyi zaman möhkəmlənir. Keçmişin xəstəlikləri isə sağlam siyasi iradə qarşısında öz gücünü itirir”, - deyə Rəşad Mahmudov vurğulayıb.
Bölmənin digər xəbərləri
