Şair Ramaldanov: Antiterror tədbirləri Azərbaycanın bütün ərazilərində dövlət suverenliyini tam bərpa edib
Bakı, 19 sentyabr, AZƏRTAC
Azərbaycan xalqının müasir tarixində torpaqlarının işğalı, Xocalı faciəsi və digər ağır hadisələrlə üzləşdiyi dövr mühüm yer tutur. Uzun illər ərzində beynəlxalq qurumların qəbul etdiyi sənədlərə baxmayaraq, Azərbaycan ərazilərinin işğaldan azad edilməsi ilə bağlı tələblərin icrası təmin edilmədi. Belə bir şəraitdə Azərbaycan xalqı ölkənin ərazi bütövlüyünü bərpa etmək üçün bütün imkanlarını səfərbər etdi.
Bu fikirləri AZƏRTAC-a açıqlamasında hərbi ekspert Şair Ramaldanov bildirib. Ekspert qeyd edib ki, tarixdə müxtəlif xalqların işğala məruz qalması ilə bağlı çoxsaylı nümunələr mövcuddur. Lakin işğalçı qüvvələri məğlub edərək ərazi bütövlüyünü bərpa edən xalqların sayı o qədər də çox deyil.
“Azərbaycan xalqının keçdiyi yol bu baxımdan müasir tariximizin mühüm səhifələrindən biridir. Azərbaycan xalqı uzun illər ərzində işğal tarixlərini qeyd etməklə həmin hadisələrin unudulmamasına çalışıb. Laçının, Şuşanın və digər rayonların işğal günlərinin qeyd olunması milli yaddaşın qorunmasına xidmət edib. Bütün bunlara baxmayaraq, Azərbaycan xalqı sınmayıb, öz birliyini qoruyub və Vətən müharibəsində öz iradəsini sözlə deyil, əməli, qəhrəmanlığı və Qələbəsi ilə nümayiş etdirib”, -deyə müsahibimiz vurğulayıb.
Ş.Ramaldanov bildirib ki, 2016-cı ilin Aprel döyüşlərindən sonra Azərbaycan Prezidentinin səsləndirdiyi fikirlər ordumuzun qarşıya qoyulan vəzifələri yerinə yetirməyə hazır olduğunu göstərirdi: “Həmin dövrdə Azərbaycan Ordusunun qısa müddətdə işğalçı qüvvələri darmadağın edərək ərazi bütövlüyünü bərpa etmək iqtidarında olduğu vurğulanmışdı. Bu, həm də Silahlı Qüvvələrin hazırlıq səviyyəsinə dair cəmiyyətə verilən mühüm mesaj idi.
Sonrakı dövrdə Ermənistan rəhbərliyinin, xüsusilə Nikol Paşinyan hakimiyyətinin yeni ərazilərin işğalı ilə bağlı səsləndirdiyi bəyanatlar Azərbaycanın qarşısında duran təhlükənin aradan qaldırılmasını zəruri edirdi. 44 günlük Vətən müharibəsində Azərbaycan Ordusu, xalq və dövlət bir yumruq kimi birləşərək işğalçı qüvvələrə qarşı mübarizə apardı və ərazi bütövlüyümüzü bərpa edərək Qələbə qazandı”.
O bildirib ki, Vətən müharibəsindən sonra Qarabağda Azərbaycan ərazisinin bir hissəsində dövlət qanunlarının tam şəkildə tətbiqi mümkün deyildi: “Rusiya sülhməramlı qüvvələrinin müvəqqəti yerləşdiyi ərazidə separatçı rejimin silahlı birləşmələri mövcudluğunu davam etdirir, yeni mövqelər qurur və silahlanırdı. Ermənistan ərazisindən həmin qanunsuz silahlı birləşmələrə silah-sursatın çatdırılması ilə bağlı məlumatlar da mövcud idi. Azərbaycan bu prosesləri diqqətlə izləyir və Qarabağda baş verənlərə münasibətdə öz etirazlarını dəfələrlə ifadə edirdi. Ərazilərdə təbii sərvətlərin qanunsuz istismarı, ekoloji problemlər, habelə Azərbaycan nümayəndələrinin və jurnalistlərin həmin ərazilərə buraxılması ilə bağlı tələblərin yerinə yetirilməməsi vəziyyəti daha da mürəkkəbləşdirirdi.
Azərbaycan Ermənistanla Xankəndi arasında yolun üzərində sərhəd-buraxılış məntəqəsi yaratmaqla öz iradəsini və dövlət kimi mövqeyinin ciddiliyini göstərdi. Azərbaycan dövləti həmin ərazidə və ətrafında gedən prosesləri daim müşahidə edirdi. Çünki separatçı silahlı birləşmələrin fəaliyyətinin davam etdirilməsi gələcəkdə yeni münaqişə ocağının yaranması təhlükəsini artırırdı”.
O qeyd edib ki, Azərbaycan ərazisində dövlət suverenliyinin tam təmin olunmadığı vəziyyət uzun müddət davam edə bilməzdi: “Bu səbəbdən 2023-cü il sentyabrın 19-da Azərbaycan Prezidenti, Müzəffər Ali Baş Komandan İlham Əliyevin qərarı ilə lokal xarakterli antiterror tədbirlərinə başlanıldı. Əməliyyat Azərbaycan dövlətinin iradəsini, Azərbaycan Ordusunun gücünü və peşəkarlığını bir daha nümayiş etdirdi.
Geniş ərazidə və müxtəlif istiqamətlərdə yerləşən qanunsuz silahlı birləşmələrin mövqelərinə qarşı həyata keçirilən əməliyyat qısa müddətdə nəticə verdi. Azərbaycan Ordusu qanunsuz silahlı birləşmələrin mövqelərini zərərsizləşdirdi, onların tərksilah olunmasını təmin etdi və separatçı rejimin hərbi imkanlarını aradan qaldırdı. Antiterror tədbirlərinin ən mühüm nəticəsi Azərbaycanın bütün ərazisində dövlət suverenliyinin bərpa olunması idi. Bununla da Vətən müharibəsində başlanan proses başa çatdırıldı, Azərbaycan ərazi bütövlüyünü və suverenliyini tam şəkildə təmin etdi. Bu tarixi nəticənin əldə olunmasında Vətən müharibəsində və antiterror tədbirlərində canından keçən şəhidlərin, sağlamlığını itirməsinə baxmayaraq qarşıya qoyulan tapşırıqları yerinə yetirən qazilərin və bütün hərbi qulluqçuların qəhrəmanlığı mühüm rol oynayıb”, - deyə o bildirib.
Bölmənin digər xəbərləri
