Bakı, 19 sentyabr, AZƏRTAC

İcbari Tibbi Sığorta üzrə Dövlət Agentliyi (Agentlik) pilot tibb müəssisələrində-Mingəçevir şəhər və Yevlax rayon Mərkəzi Xəstəxanalarında çalışan orta tibb işçiləri arasında keçirilmiş “Tibb işçilərinin işdən məmnunluğunun və icbari tibbi sığorta sisteminin tətbiqinə münasibətinin öyrənilməsinə dair sorğunun” nəticələri əsasında hazırlanan hesabatları açıqlayıb.

Agentliyin mətbuat xidmətindən AZƏRTAC-a bildiriblər ki, sorğularda Mingəçevir şəhər Mərkəzi Xəstəxanasından (Mingəçevir ŞMX) 277, Yevlax rayon Mərkəzi Xəstəxanasından (Yevlax RMX) 202 nəfər orta tibb işçisi iştirak edib.

Hesabatda göstərilir ki, 2016-cı ildə Mingəçevir ŞMX-də çalışan orta tibb işçilərinin 94,6, Yevlax RMX-də isə 93,6 faizi 105-250 manat həcmində məvacib alıb. 2017-сi ildən etibarən icbari tibbi sığortanın (İTS) tətbiqindən sonra Mingəçevir ŞMX və Yevlax RMX-də fəaliyyət göstərən orta tibb işçilərinin əmək haqlarına sabit əlavələr edilib. Bunun nəticəsində Mingəçevir ŞMX-də çalışan orta tibb işçilərinin 68, Yevlax RMX-də isə 30 faizinin məvacibi 251-450 manat olub. Mingəçevir ŞMX üzrə 60, Yevlax RMX üzrə 74,2 faiz aldıqları məvacibdən məmnunluq səviyyəsi qeydə alınıb.

Sorğuların nəticələrindən məlum olub ki, Mingəçevir ŞMX-də aparılmış islahatlardan orta tibb işçilərinin 78, Yevlax RMX-də aparılmış islahatlardan 83.6, vətəndaş kimi İTS-nin tətbiqindən Mingəçevir ŞMX-də 83,8, Yevlax RMX-də 89,1, iş yerinin texniki təchizatından Mingəçevir ŞMX-da 66,4, Yevlax RMX-də isə 77,3 faizi razıdır.

Mingəçevir ŞMX və Yevlax RMX-də çalışan orta tibb işçilərinin əksəriyyəti İTS-nin tətbiqinin onların çalışdıqları tibb müəssisəsinə müsbət təsir etdiyini bildirib. Onlar tibb müəssisələrinin müvafiq tibbi avadanlıqlarla, dərman vasitələri ilə təchizatının və iş şəraitinin yaxşılaşmasını, nizam-intizamın güclənməsini, tibbi xidmətlərin keyfiyyətinin yüksəlməsini, onlara əlçatanlığın artmasını və pasiyentlərin məmnunluğunun artmasını müsbət qiymətləndiriblər.

Tibb müəssisələrində işin təkmilləşdirilməsi məqsədilə verilən təkliflərdə orta tibb işçilərinin əksəriyyəti bilik və bacarıqlarının təkmilləşdirilməsi üçün ixtisasartırma kurslarının və təlimlərin təşkilini, tibb müəssisələrinin strukturunun dəyişdirilməsini, fəaliyyətinin gücləndirilməsini və İTS-nin əhatə dairəsinin genişləndirilməsinin vacibliyini vurğulayıblar.

Agentlik həmçinin Ağdaş rayon Mərkəzi Xəstəxanasında (Ağdaş RMX) “Tibb işçilərinin işdən məmnunluğunun və icbari tibbi sığorta sistemi ilə bağlı məlumatlılıq səviyyəsinin öyrənilməsinə dair” keçirilən sorğunun nəticələrini ictimaiyyətə təqdim edib. Qeyd edək ki, həmin sorğu ölkə Prezidentinin Ağdaş rayonu üzrə icbari tibbi sığortanın tətbiqi ilə bağlı Fərmanı imzaladığı tarixdən bir ay sonra keçirilib. Bunu nəzərə alaraq Ağdaş RMX-da 249 nəfər arasında keçirilən sorğu zamanı orta tibb işçilərinin əmək haqlarının müqayisəli təhlili aparılmayıb, onların işdən məmnunluğu, İTS-lə bağlı məlumatlılığı, təlimə ehtiyaclarının qiymətləndirilməsi və İTS-lə bağlı gözləntiləri müəyyən edilib.

Nəticələrdən məlum olur ki, Ağdaş RMX-də çalışan orta tibb işçilərinin 38,9 faizi aldığı məvacibdən razıdır. Burada iş qrafikindən razı olanlar 88,8, iş yükündən razı olanlar 82,4 faiz təşkil edir. Orta tibb işçilərinin 48,2 faizi iş şəraitini yüksək qiymətləndirib.

Sorğuda iştirak edənlərin 83,9 faiz orta tibb işçisi pasiyentlə işləməkdən çox məmnundur. Tibb müəssisəsində işin daha səmərəli təşkili və tibbi xidmətlərin keyfiyyətinin artırılması üçün təlimlərin təşkilini zəruri hesab edənlər 78 faiz təşkil edib. Burada çalışan orta tibb işçilərinin 94,7 faizi İTS-nin tətbiqinin müsbət dəyişikliklərə səbəb olacağını bildirib.

Orta tibb işçiləri işin təkmilləşdirilməsi məqsədilə tibb müəssisəsinin dərman vasitələri, tibbi avadanlıqlarla təminatını, iş şəraitinin yaxşılaşdırılmasını və əmək haqlarının artırılmasını təklif ediblər.

Bu il aparılan sorğu agentlik və hər üç bölgənin Səhiyyə İşçilərinin Həmkarlar İttifaqı Şuraları ilə birgə keçirilib.

Hesabatlar Agentliyin rəsmi internet saytı its.gov.az-da yerləşdirilib.