ELM VƏ TƏHSİL


QARA İLYASOV ADINA QUBADLI 1 NÖMRƏLİ ORTA MƏKTƏBİNİN 125 İLLİK YUBİLEYİ QEYD EDİLMİŞDİR

Qubadlı rayonundakı Qara İlyasov adına 1 nömrəli orta məktəbin əsası 1882-ci ildə qoyulmuşdur. Məktəbin 125 yaşı tamam olmuşdur. Ermənistanın hərbi təcavüzü nəticəsində məcburi köçkünlərə çevrilmiş bu rayonun sakinləri, məlum olduğu kimi, əsasən Sumqayıtda məskunlaşmışlar. AZƏRTAC xəbər verir ki, dekabrın 15-də Səməd Vurğun adına Sumqayıt şəhər mədəniyyət sarayında təşkil edilmiş yubiley mərasiminə respublikanın dövlət qurumlarının, idarə və təşkilatların, rayon ictimaiyyətinin nümayəndələri və məktəbin məzunları toplaşmışdı.

Səhər tezdən rayon icra hakimiyyətinin nümayəndələri, qonaqlar və məktəbin pedaqoji kollektivinin üzvləri Bakıda Fəxri xiyabana getmiş, Azərbaycan xalqının ümummilli lideri dahi Heydər Əliyevin işıqlı xatirəsini yad etmiş, onun məzarı önünə tər güllər qoymuşlar.

Görkəmli oftalmoloq alim, akademik Zərifə xanım Əliyevanın məzarı önünə də tər çiçəklər düzülmüşdür. Vətənimizin müstəqilliyi və ərazi bütövlüyü uğrunda canlarından keçmiş, Sumqayıtdakı Şəhidlər xiyabanında uyuyan mərd vətən oğullarının xatirəsi də yad edilmiş, onların məzarları üzərinə güllər qoyulmuşdur.

Mədəniyyət sarayının foyesində bu gün qeyri-adi canlanma var idi. Burada Qara İlyasov adına 1 nömrəli orta məktəbin keçdiyi şərəfli yoldan bəhs edən böyük fotostend düzəldilmişdi. Əksəriyyəti ilk dəfə nümayiş etdirilən fotoşəkillərdə İrəvan gimnaziyasının məzunları, sonra bu dünyəvi məktəbin ilk müəllimləri olmuş direktor Həşim bəy Nərimanbəyovun və Mehdi bəy Məlikaslanovun nurlu simaları diqqəti cəlb edir. Fotomateriallar kaleydoskopuna baxan tamaşaçılar öz müəllimlərini bir daha xatırladılar. Axı, bu məktəbin on minlərlə məzunu məhz həmin insanların ağlı, zəkası, istedadı və yüksək vətənpərvərliyi sayəsində həyata vəsiqə almışdır.

Atalar yaxşı deyiblər ki, insanı nə qədər xatırlayırlarsa, onun ömrü də o qədərdir. Bu əlamətdar gündə məktəbin yubiley mərasiminə toplaşanlar onun inkişafına töhfələr vermiş, pərvazlandığı bu ocağa ləyaqətlə xidmət etmiş hər kəsin xatirəsini yad etdilər. “Bərgüşad” qəzetinin bu şanlı yubileyə həsr edilmiş xüsusi buraxılışı tədbir iştirakçılarına paylandı. Qəzetin bu nömrəsində məktəbin tarixinin bir sıra şanlı səhifələrindən bəhs edilir. Bu materiallarla tanış olduqda məlum olur ki, Qubadlıda ilk dünyəvi məktəb yaradılması təşəbbüsünü irəli sürənlər rayon sakinləri İbrahim bəy və Qazi Həsən bəy olmuşdur. Onlar 1882-ci ilin may ayında Yelizavetpol (Gəncə) qubernatorunun qəbulunda olmuş, rayonda ilk dünyəvi məktəbin açılmasına icazə almışdılar. Elə həmin ilin sentyabr ayında məktəb fəaliyyətə başlamış və iki nəfər müəllim 43 şagirdə dünyəvi elmlərdən dərs deməyə başlamışdı. Sonra bu məktəbin rəhbəri estafetini sovet dönəmində ilk ordenə layiq görülmüş soydaşımız Çingiz İldırımın yaxın qohumu, Qori Seminariyasında təhsil almış Həsən bəy Sultanov qəbul etmişdi. Məktəbdə tədrisin həm də rus dilində aparılması onun məzunlarına təhsillərini Rusiyanın və Avropanın ali məktəblərində davam etdirmək imkanı verirdi. Məktəbdə qızlar da oxuyurdu. Məktəbin ən yaxşı məzunlarının siyahısına yüksək nailiyyətlər əldə etmiş şagirdlərin adı daxil edilmişdir. Onların arasında 6 nəfər Milli Qəhrəman, 4 nəfər Sosialist Əməyi Qəhrəmanı, 9 nəfər görkəmli dövlət xadimi və ictimai xadim, 18 elmlər doktoru, 18 elmlər namizədi, 4 məşhur yazıçı, 3 jurnalist, 2 tanınmış idmançı vardır. Məktəbin müəllimlərindən beş nəfəri dövlət təltiflərinə layiq görülmüşdür.

Salonda bayram əhval-ruhiyyəsi hiss olunurdu. Azərbaycanın dövlət himni səsləndi.

Respublikanın təhsil naziri Misir Mərdanov Azərbaycan Prezidenti İlham Əliyevin təbrik məktubunu oxudu. Tədbir iştirakçıları dövlətimizin başçısının xoş sözlərini və arzularını ayaq üstə, gurultulu alqışlarla qarşıladılar. Nazir məktəbin direktoru Nuşirəvan Əsədova və pedaqoji fəaliyyətdə fərqlənmiş müəllimlərə “Respublikanın qabaqcıl təhsil işçisi” döş nişanlarını və nazirliyin fəxri fərmanlarını təqdim etmişdir.

Yubilyar məktəbin şagirdləri musiqi sədaları altında zala daxil olmuşlar. Vətənimizi və xalqımızı tərənnüm edən şeirlər səslənmişdir. Respublika Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov dövlətimizin başçısı İlham Əliyevin məcburi köçkünlərin yaşayış şəraitinin yaxşılaşdırılması üçün həyata keçirdiyi irimiqyaslı layihələr barədə məlumat vermişdir. Ə.Həsənov yubilyar məktəbin kollektivini təbrik edərək onları əmin etmişdir ki, növbəti tədris ili başlanana qədər Sumqayıtda dövlət vəsaiti hesabına bu məktəb üçün yeni bina tikiləcəkdir.

Sumqayıt Şəhər İcra Hakimiyyətinin başçısı Vaqif Əliyev qeyd etmişdir ki, XIX əsrin axırlarında Qubadlıda ilk təhsil ocağının yaradılması bu ucqar dağlıq diyarın əhalisinin maariflənməsində və inkişafında çox müsbət rol oynamışdır. Natiq qeyd etmişdir ki, bu məktəbin özünəməxsus ənənələri vardır. Bu ənənələr layiqincə davam etdirilir. Şəhər icra hakimiyyətinin başçısı tədbirə toplaşanları sumqayıtlılar adından təbrik edərək bildirmişdir ki, məktəb binasının tikilməsi üçün torpaq sahəsi ayrılmışdır.

Şuşa Rayonu İcra Hakimiyyətinin başçısı Nizami Bəhmənov, Cəbrayıl Rayonu İcra Hakimiyyətinin başçısı Mahmud Quliyev, Milli Məclisin deputatı, Texniki Universitetin prorektoru Aslan Şahverdiyev, məktəbin məzunları - Pedaqoji Universitetin professoru Edil Eyvazov və Bakı Dövlət Universitetinin professoru Abbas Abbasov onlara həyat vəsiqəsi vermiş doğma məktəb haqqında xatirələrini söyləmiş, onun kollektivinə uğurlar arzulamışlar.

Qubadlı Rayonu İcra Hakimiyyətinin başçısı Malik İsaqov yubiley tədbirinə yekun vuraraq çıxış edənlərə səmimi sözlərinə görə təşəkkürünü bildirmiş, dövlətimizin məcburi köçkünlərin ehtiyaclarına diqqətini və qayğısını xüsusi vurğulamışdır. Qeyd edilmişdir ki, respublika iqtisadiyyatının dinamik inkişafı bu qəbildən olan insanların rifahının yaxşılaşmasına təsir göstərir. Natiq qeyd etmişdir ki, yağı düşmənin təcavüzü nəticəsində doğma yurdlarından didərgin düşmüş rayon sakinləri bütün çətinliklərə baxmayaraq, yaxın gələcəkdə öz ata yurdlarına qayıdacaqlar. Rayon icra hakimiyyətinin başçısının qeyd etdiyi kimi, ümummilli lider Heydər Əliyevin siyasi xəttinin layiqli davamçısı Prezident İlham Əliyevin məqsədyönlü fəaliyyəti buna əminlik yaradır. M.İsaqov bildirmişdir ki, Qubadlı camaatı möhtərəm İlham Əliyevi ölkəmizin alternativi olmayan prezidenti kimi görür. Rayon sakinləri Qarabağ probleminin dinc yolla həll edilməsinin mümkünlüyünü məhz Prezident İlham Əliyevin adı ilə bağlayırlar. Rayon rəhbəri qeyd etmişdir ki, Qubadlı sakinləri Prezident İlham Əliyevə tam etimad bəsləyir və növbəti seçkilərdə onu dəstəkləyəcəklərini bəyan edirlər.

Tədbir iştirakçıları adından Azərbaycan Prezidenti İlham Əliyevə müraciət qəbul edilmişdir.

Təntənəli yığıncaqda Prezidentin İcra Aparatının məsul işçisi Rövşən Ağayev, Abşeron Rayonu İcra Hakimiyyətinin başçısı Zakir Fərəcov, Nazirlər Kabinetinin şöbə müdiri Qurban Sadıqov, Milli Məclisin deputatı İmamverdi İsmayılov və başqaları iştirak edirdilər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.