ELM VƏ TƏHSİL
Qafqaz Universiteti ilə “Avro Med” şirkəti arasında memorandum imzalanmışdır
Bakı, 2 mart (AZƏRTAC). Martın 2-də “Avro Med” şirkətinin təsisçisi, Milli Məclisin deputatı Cavanşir Feyziyev Qafqaz Universitetində olmuşdur.
AZƏRTAC xəbər verir ki, görüşdə Qafqaz Universitetinin rektoru, professor Əhməd Saniç bu ali məktəbdə təhsilin inkişafı üçün reallaşdırılan tədbirlərdən danışmışdır.
Azərbaycanın iqtisadiyyatında və digər sahələrində mühüm nailiyyətlər qazanıldığını bildirən rektor, tanınmış xeyriyyəçilərin yolunu bu gün davam etdirən insanların sayının artdığını diqqətə çatdırmışdır. Qeyd etmişdir ki, həmin xeyriyyəçi insanlardan biri də “Avro Med” şirkətinin təsisçisi Cavanşir Feyziyevdir. Onun təşəbbüsü və dəstəyi ilə universitetimizdə Biologiya laboratoriyası yaradılacaqdır.
C.Feyziyev ümummilli lider Heydər Əliyevin təhsilə daim böyük önəm verdiyini vurğulamışdır.
Müasir dünyada təhsilin mühüm rolunu xatırladan deputat “Çağ” Öyrətim İşlətmələri Şirkəti və Qafqaz Universitetinin bu sahədə fəaliyyətinə yeni uğurlar arzulamışdır.
Sonra Qafqaz Universiteti ilə “Avro Med” şirkəti arasında əməkdaşlığa dair memorandum imzalanmışdır.
Sənədi Ə.Saniç və C.Feyziyev imzalamışlar.
Memorandumda universitetdə Biologiya laboratoriyasının yaradılması nəzərdə tutulur.