Mühacirətdə - fikir və missiya: seçim, yoxsa zərurət
Bakı, 6 fevral, AZƏRTAC
Milli Azərbaycan Tarixi Muzeyində görkəmli dövlət, siyasi və ictimai xadim, Azərbaycan Xalq Cümhuriyyətinin banilərindən biri Məhəmməd Əmin Rəsulzadənin anadan olmasının 142-ci ildönümünə həsr edilmiş tədbir keçirilib.
AMEA Rəyasət Heyəti aparatının Elmi irs şöbəsindən AZƏRTAC-a bildirilib ki, tədbirdə Varşava Universitetinin müəllimi, Azərbaycan Araşdırmaları Mərkəzinin rəhbəri Şəhla Kazımovanın “Mühacirətdə - fikir və missiya: seçim, yoxsa zərurət?” mövzusunda məruzəsi dinlənilib.
Məruzədə 1922-ci ildə aparılan siyasi müzakirələr, həmin illərin siyasi vəziyyəti öz əksini tapıb. Şəhla Kazımova M.Ə.Rəsulzadənin mövcud şəraitlə barışmaq əvəzinə, ondan şüurlu şəkildə imtina etdiyini vurğulayıb, Rəsulzadənin Moskvadan gedişinin təhlükədən qaçış, siyasi sığınacaq axtarışı deyil, həyatının qayəsi olan ideyasını qorumaq üçün şəxsi seçimi olduğunu bildirib: “Ona elmi və ictimai sahələrdə vəzifələr təklif olunsa da, Rəsulzadə sistemin daxilində xüsusi rol oynayacağına dair məlumatlandırılsa da, mövcud şəraitlə barışmır, ondan şüurlu imtina edir”.
Sonra ANS Şirkətlər qrupunun prezidenti Vahid Mustafayevin təqdimatında M.Ə.Rəsulzadənin yaşadığı binaya virtual xatirə lövhəsi – barelyefin vurulması layihəsilə tanışlıq olub, Rəsulzadənin “rasulzademuzeyi.org” virtual muzeyinə ziyarət təşkil edilib.
Tədbirin təşkilatçısı və moderatoru AMEA-nın akademik Ziya Bünyadov adına Şərqşünaslıq İnstitutunun baş elmi işçisi, tarix elmləri doktoru Solmaz Rüstəmova-Tohidi M.Ə.Rəsulzadənin ideologiyasından söz açıb. Beynəlxalq Rəsulzadə qiraətlərinin çap edildiyini xatırladan Solmaz Tohidi Məhəmməd Əmin Rəsulzadənin mübarizəsini antikommunizm və antisovetizm istiqamətində apardığını, ömrünü ideyaları, amalları üçün doğma yurddan kənarda keçirən mühacirlərimiz sırasında öz dəyanəti ilə fərqləndiyini diqqətə çatdırıb.
İldönümündə M.Ə.Rəsulzadənin nəvəsi Rais Rəsulzadə, professor Qulu Məhərrəmli, dosent Firdovsiyyə Əhmədova və digərləri çıxış edərək M.Ə.Rəsulzadənin xidmətləri barədə fikirlərini bölüşüblər.
Tədbirdə, həmçinin AMEA Rəyasət Heyəti aparatının Elmi irs şöbəsinin müdiri tarix elmləri doktoru, dosent Zemfira Hacıyeva və şöbənin əməkdaşları iştirak ediblər.
Sonda Dilqəm Əhmədin şəxsi kolleksiyasında M.Ə.Rəsulzadəyə aid eksponatlardan ibarət sərgiyə baxış keçirilib.
Bölmənin digər xəbərləri
