Turan Məmmədəliyeva: “Arşın mal alan” layihəsinin festivala daxil edilməsi bizim üçün qürurvericidir
Bakı, 30 sentyabr, AZƏRTAC
Azərbaycanın Xalq artisti, əfsanəvi “Qaya” kvartetinin solisti Rauf Babayev 2015-ci ildən etibarən “Arşın mal alan” musiqili komediyasının əsas nömrələri və fraqmentləri əsasında bir fantaziya hazırlamışdı. İnstrumental və aranjiman işləri isə Rauf Babayevin nəzarəti altında Nazim Əhmədov tərəfindən işlənilib.
Bu fikirləri AZƏRTAC-a açıqlamasında musiqişünas, “Qaya” Dövlət Ansamblının direktoru Turan Məmmədəliyeva deyib.
Onun sözlərinə görə, layihənin tam şəkildə reallaşdırılması müəyyən texniki və maddi problemlər səbəbindən mümkün olmayıb. Belə ki, 2020-ci ildə Rauf Babayev, bu ilin aprel ayında isə Nazim Əhmədov dünyasını dəyişib.
“Bizim üçün çox fərəhli və sevindirici haldır ki, 2024-cü ildə bu layihəni üç konsertdə təqdim etdik. Bu gün isə layihəmiz Üzeyir Hacıbəyli XVIII Beynəlxalq Musiqi Festivalı çərçivəsində təqdim olunur. Buna görə də Mədəniyyət Nazirliyinə xüsusi minnətdarlığımı bildirmək istəyirəm. Biz Mədəniyyət Nazirliyinin nəzdində çalışan dövlət ansamblıyıq, amma layihənin dahi Üzeyir bəyin adını daşıyan festivala daxil edilməsi bizim üçün olduqca əlamətdar hadisədir”, - deyə T.Məmmədəliyeva əlavə edib.
Bölmənin digər xəbərləri
