ŞAİRƏ ZƏRƏNGİZ DƏMİRÇİ QAYALI AZƏRBAYCAN UNİVERSİTETİNİN TƏLƏBƏLƏRİ İLƏ GÖRÜŞMÜŞDÜR
Bakı, 18 aprel (AZƏRTAC). Aprelin 18-də Azərbaycan Universitetində şairə Zərəngiz Dəmirçi Qayalı bu təhsil ocağının tələbələri ilə görüşmüşdür.
Görüşdə çıxış edənlər şairənin şeirləri və poemalarının məziyyətindən danışmış, yaradıcılığını yüksək qiymətləndirmişlər.
Şairənin yaradıcılığından nümunələr söylənmişdir.
Tədbirdə şairənin “Qayalı” kitabı da təqdim edilmişdir. Müəllif bu kitabında xalqının mənəvi dəyərlərini poetik dillə ifadə etmişdir. Məlumat verilmişdir ki, Qayalı Qazax rayonunun Daş Salahlı kəndində müəllifin özünün də mənsub olduğu nəslin adıdır.
Xatırladaq ki, Zərəngizin “Qayalı”dan əvvəl “Haqqı sevdim”, “Vəfam mənim”, “Güllələnmişlər” kitabları nəşr edilmişdir. Müəllif kitaba yazdığı “Ön söz”də sözünü bir səhər küləyi adlandırır. Bəlkə də bu, sözlərinin oxucuların ürəyinə sərinlik, təskinlik gətirəcəyinə inam hissindən irəli gəlir. Beynəlxalq Kitab Evi İctimai Birliyinin dəstəyi ilə nəfis tərtibatda çap edilmiş kitaba şairin yüz altmışa yaxın şeiri, doqquz poeması daxil edilmişdir. Nəşrin redaktoru şair-publisist Əlirza Xələflidir.
Zərəngiz Dəmirçi Qayalı tədbirin təşkilatçılarına təşəkkür etmiş, tələbələrə təhsildə uğurları, vətənə, xalqa layiqli övlad olmağı arzulamışdır.
######
Bölmənin digər xəbərləri
