İQTİSADİYYAT


SOCAR Gürcüstanda daha bir yaşayış məntəqəsini təbii qazla təmin edib

Tbilisi, 18 sentyabr, AZƏRTAC

Sentyabrın 18-də Gürcüstanın Kvemo-Kartli regionunda azərbaycanlıların yığcam yaşadıqları İlməzli kəndinə təbii qaz verilib.

AZƏRTAC xəbər verir ki, açılış mərasimində SOCAR prezidenti Rövnəq Abdullayev, Azərbaycanın bu ölkədəki səfiri Faiq Quliyev, Kvemo-Kartli-Borçalı bölgəsinin qubernatoru Şota Rekviaşvili, parlamentin deputatı Zaur Darğallı, Gürcüstanın iqtisadi inkişaf nazirinin müavini David Tvalabeişvili və digər rəsmi şəxslər iştirak ediblər.

“SOCAR Georgia Gas” MMC tərəfindən çəkilən qazpaylayıcı xəttin əsası 2020-ci il oktyabrın 21-də qoyulub.

Mərasimdə qeyd olunub ki, SOCAR-ın sərmayəsi ilə tikilən 13 min 145 metrlik şəbəkə bir sıra yaxın yaşayış məntəqələrini də əhatə edəcək və 227 abonentin təbii qazla təminatı üçün imkan yaradacaq.

“SOCAR Georgia Gas” MMC 13-ü Kvemo-Kartlidə, 2-si Msxeta-Mtianetidə olmaqla 15 yaşayış məntəqəsində qazpaylayıcı şəbəkənin tikntisini tamamlamağı planlaşdırır. Ümumi uzunluğu 129 kilometr olacaq bu şəbəkənin tikintisi başa çatdırıldıqdan sonra daha 2483 abonent qazla təmin olunub.

Qeyd edək ki, Azərbaycanlıların yaşadığı 78 yaşayış məntəqəsindən 60-ı artıq qazlaşdırılıb. Plana uyğun olaraq, daha 7 kənddə 1111 abonent üçün ümumi uzunluğu 7,3 kilometr olan qaz kəmərləri çəkilir. Marneuli üzrə qazlaşdırmanın səviyyəsi 80,2 faiz təşkil edir.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.