CƏMİYYƏT
Tibb Universitetinin “YouTube” kanalında tələbələrə 3 dildə videomühazirələr təqdim olunur
Bakı, 6 aprel, AZƏRTAC
Azərbaycanın bütün təhsil müəssisələrində koronavirus təhlükəsi ilə əlaqədar tətil davam edir. Nazirlər Kabineti yanında Operativ Qərargahın dünyada yayılmış COVID-19 pandemiyası ilə əlaqədar xüsusi karantin rejiminin tətbiq edilməsi haqqında qərarına və Təhsil Nazirliyinin tövsiyələrinə uyğun olaraq, Azərbaycan Tibb Universitetində (ATU) də bir sıra tədbirlər həyata keçirilir.
Universitetin mətbuat xidmətindən AZƏRTAC-a bildiriblər ki, təhsildə fasilənin aradan qaldırılması və tədrisin keyfiyyətinin qorunub saxlanılması məqsədilə universitetin “YouTube” kanalında xüsusi bölmə yaradılıb. ATU-da 2019/2020-ci ilin yaz semestrində tədris olunan bir çox fənlər üzrə mühazirələr bu bölməyə yerləşdirilib. Universitetin müəllim-professor heyəti tərəfindən hazırlanan videomühazirələr tələbələrə 3 dildə - Azərbaycan, rus və ingilis dillərində təqdim olunur.
ATU-nun İnsan anatomiyası və tibbi terminologiya kafedrasında isə dərslər onlayn formada davam etdirilir. Kafedranın müdiri, akademik Vaqif Şadlinskinin rəhbərliyi altında professor-müəllim heyəti tərəfindən tələbələrə Azərbaycan, rus və ingilis dillərində onlayn dərslər keçirilir. Dərslərin hər biri keyfiyyətli videolar, slaydlar, rəngli anatomik görüntülərlə müşayiət olunur. Dərslərlə yanaşı, kafedra əməkdaşları da hər gün onlayn konfranslar təşkil edir, bir-birlərinə praktik dərslər, anatomik mühazirələr haqqında hesabat verirlər. Belə konfranslar zamanı gündəmlə bağlı əhəmiyyətli məsələlər də müzakirə olunur.