MƏDƏNİYYƏT
“YENİ HƏYAT” QƏZETİ MASALLININ GÜNDƏLİK HƏYATINDA MÜHÜM ROL OYNAYIR
Bu fikirlər Masallı rayonunda çıxan “Yeni həyat” qəzetinin 75 illik yubileyi ilə əlaqədar şəhər mədəniyyət evində keçirilən toplantıda səslənmişdir.
Qəzetin əməkdaşları və rayonun rəhbər işçiləri əvvəlcə icra hakimiyyəti binasının foyesində ümummilli liderimiz Heydər Əliyevin büstünün önünə gül dəstələri düzmüş, böyük öndərin xatirəsini ehtiramla yad etmişlər.
Yığıncaqda rayon icra hakimiyyətinin başçısı Qəzənfər Ağayevin Milli Mətbuat günü və “Yeni həyat” qəzetinin 75 illik yubileyi ilə əlaqədar jurnalistlərə unvanladığı təbrik məktubu oxunmuşdur.
“Yeni həyat” qəzetinin redaktoru Əyyub Mehdiyev qəzetin 75 illik fəaliyyəti barədə məruzə ilə çıxış etmişdir.
Yubiley mərasimdə Milli Məclisin deputatları Sabir Rüstəmxanlı, Əhəd Abıyev, «Oqonyok» jurnalının əməkdaşı Vasif Səmədov, “Azərbaycan” jurnalı baş redaktorunun müavini Vaqif Yusifli, rayon ağsaqqallarının, gənclərin və ictimaiyyətin nümayəndələri çıxış edərək Azərbaycanda demokratik mətbuatın formalaşmasında, onun hüquqi bazasının yaradılmasında, fikir və söz azadlığının təmin edilməsində ümummilli liderimiz Heydər Əliyevin əvəzsiz xidmətlərindən danışmış, dövlət-mətbuat münasibətlərində ulu öndərimizin siyasətinin və ənənələrinin Azərbaycan Prezidenti İlham Əliyev tərəfindən davam etdirildiyini diqqətə çatdırmış, 1932-ci ildə nəşrə başlanan “Yeni həyat” qəzetinin rayonun gündəlik həyatında, sosial-iqtisadi inkişafında və real həqiqətlərin təbliği sahəsində fəaliyyətini yüksək qiymətləndirmişlər.
Tədbirdə qəzetin əməkdaşları Aydın Əliquliyev, Rəsul Rzayev, Həsənağa Əliyev və Əyyub Mehdiyevə Azərbaycan Kütləvi İnformasiya Vasitələri İşçiləri Həmkarlar İttifaqi Rəyasət Heyətinin “Qızıl qələm” mükafatı, digər əməkdaşlara isə rayon icra hakimiyyəti başçısının fəxri fərmanları təqdim edilmişdir.