“ZƏNGİLANIN SƏSİ” QƏZETİNİN 75 İLLİYİNƏ HƏSR OLUNMUŞ TƏDBİR KEÇİRİLMİŞDİR
AZƏRTAC xəbər verir ki, dekabrın 25-də Zəngilan Rayon İcra Hakimiyyətinin mətbu orqanı olan “Zəngilanın səsi” qəzetinin 75 illik yubileyinə həsr olunmuş geniş tədbir keçirilmişdir.
Tanınmış jurnalistlərin, ictimaiyyət nümayəndələrinin iştirak etdikləri tədbirdə Zəngilan Rayon İcra Hakimiyyətinin başçısı Vəli Quliyev, Milli Məclisin deputatı İmamverdi İsmayılov, Azərbaycan Jurnalistlər Birliyinin sədr müavini Valid Sənani çıxış edərək ölkə Prezidenti İlham Əliyevin ölkəmizdə azad, demokratik mətbuatın inkişafına daim böyük önəm verdiyini vurğulamışlar.
Şərəfli tarixi yol keçən “Zəngilanın səsi” qəzetinin səmərəli fəaliyyətindən bəhs edən natiqlər bu mətbu orqanın rayonun ictimai-siyasi həyatında, iqtisadiyyatın, təhsilin, mədəniyyətin, səhiyyənin inkişafında rolunu qiymətləndirmişlər.
Natiqlər, eyni zamanda, əlamətdar gün münasibətilə tədbir iştirakçılarını təbrik etmiş, qəzetin kollektivinə yeni yaradıcılıq nailiyyətləri arzulamışlar.
Qəzetin baş redaktoru Xanoğlan Talıblı “Zəngilanın səsi”nin inkişaf mərhələləri haqqında ətraflı məlumat vermişdir.
75 il bundan öncə nəşrə başlamış, əvvəllər müxtəlif adlarla (“Stalinçi” (1932-1954), “Zəngilan kommunisti” (1954-1963), “Kənd həyatı” (1963-1990) ) çap olunmuş “Zəngilanın səsi” bu gün də öz fəaliyyətini uğurla davam etdirir, oxucularına dəyərli informasiyalar, məlumatlar çatdırır.
Digər çıxış edənlər də rayonun son 75 illik zəngin tarixini özündə yaşadan, səmərəli fəaliyyəti ilə oxucularının dərin rəğbətini qazanan qəzetin tezliklə yenidən doğma Zəngilanda nəşr ediləcəyinə inandıqlarını söyləmiş, redaksiyanın əməkdaşlarını təbrik etmişlər.
Tədbirdə qəzetin nəşrində xidmətləri olan jurnalistlərə mükafatlar təqdim olunmuşdur.