SİYASƏT
"Siyasi partiyalar haqqında” yeni qanun layihəsi xalqın siyasi iradəsinin ifadəsinə və digər təməl demokratik dəyərlərə əsaslanır
![](/files/2022/3/1200x630/16669649982630647785_1200x630.jpg)
Bakı, 28 oktyabr, AZƏRTAC
“Siyasi partiyalar haqqında” yeni qanun layihəsinin hazırlanması bir sıra zərurətdən irəli gəlir. Nəzərə almaq lazımdır ki, mövcud qanun düz 30 il bundan qabaq qəbul edilib. Doğrudur, müxtəlif dövrlərdə qanuna bir çox müsbət dəyişiklər edilib. Amma geridə qalan bu dövr ərzində həm Azərbaycanda, həm də beynəlxalq müstəvidə bir çox dəyişiklər baş verib. Ölkəmizdə dövlətçilik ənənələri daha da möhkəmlənib, siyasi sistem təkmilləşib, ölkənin ən böyük problemi həlini tapıb- ərazi bütövlüyü bərpa edilib. Bu amillər müxtəlif sahələrdə, o cümlədən də siyasi partiyalarla bağlı yeni hüquqi tənzimlənməni zəruri edir. Digər tərəfdən qabaqcıl beynəlxalq təcrübədə təkmilləşmə və yeniliklər mövcuddur. Bütün bunların Azərbaycan qanunvericiliyində nəzərə alınması vacibdir.
Bunu AZƏRTAC-a açıqlamasında Milli Məclisin deputatı Aydın Hüseynov söyləyib.
Onun sözlərinə görə, “Siyasi partiyalar haqqında” yeni qanun layihəsi xalqın siyasi iradəsinin ifadəsi, siyasi plüralizm və digər təməl demokratik dəyərlər əsasında hazırlanıb. Əsas prinsip, insanların siyasi proseslərdə iştirakını, siyasi düşüncə və mövqeyinə uyğun təşkilatlanma hüququnu təmin etməkdir. Qanun layihəsində çoxpartiyalı sistemin daha da təkmilləşdirilməsini nəzərdə tutur. Qanun layihəsinin hazırlanması zamanı dövlətçilik maraqları, milli-mənəvi dəyərlərlə yanaşı beynəlxalq təcrübə və konvensiyalar da nəzərə alınıb.
"Bilirsiniz ki, bunun üçün ekspert komissiyası yaradılmışdı. Onlar beynəlxalq hüquqi sənədləri, 20 ölkənin bu sahədəki təcrübəsini öyrəniblər. Yəni hərtərəfli yanaşma və gərgin işin nəticəsində ortaya belə bir təkmil sənəd çıxıb.
Yeni qanunların qəbul edilməsində ictimai müzakirəsinin aparılması olduqca vacib bir məsələdir. Ali qanunverici orqan olan Milli Məclis buna hər zaman böyük əhəmiyyət verir. “Siyasi partiyalar haqqında” qanun layihəsinin əhəmiyyətini nəzərə alaraq son dərəcə faydalı, nəticəyə yönəlmiş fərqli mövqelərə və təkliflərə açıq ictimai dinləmələr təşkil olundu. Təkcə onu demək kifayətdir ki, Milli Məclisin siyasi partiyalara müraciətindən sonra 47 siyasi partiyadan 250-dən çox təklif daxil olub. Bu təkliflərdən bir çoxu nəzərə alınıb. İctimai dinləmə zamanı bir sıra təkliflərin nə üçün layihədə əksini tapmaması əsaslandırılıb. Bununla belə yenidən ortaya çıxan suallar və təkliflər müzakirə edilib. Onu da qeyd edim ki, ictimai dinləmələrdə parlamentdə təmsil olunmayan siyasi partiyalar da çox aktiv iştirak edib. Bütün bunlar göstərir ki, Milli Məclis siyasi plüralizmin hökm sürdüyü müzakirələrə açıq bir platforma yarada bilib, ictimai rəyə hər zaman böyük önəm verir. Bu ictimai dinləmələr həm də, parlamentlə siyasi partiyalar arasında əlaqələr baxımından vacib idi. Mən ictimai dinləmələrin olduqca səmərəli keçdiyi fikrindəyəm. Bu elə bir sənəddir ki, onun hazırlanması və qəbul edilməsi zamanı ictimai rəyin öyrənilməsi və nəzərə alınması çox vacibdir", - deyə A.Hüseynov vurğulayıb.
Qanun layihəsi ilə bağlı bəzi radikal siyasi dairələrdə narahatlıqların olmasına münasibət bildirən deputat deyib ki, onların ən çox qabartdığı məsələlərdən biri siyasi partiyaların qeydiyyata alınması üçün tələb edilən minimum üzvlərin sayının 10 minə qaldırılması tələbidir. Əslində bu, son dərəcə məqbul bir rəqəmdir. Siyasi partiya eyni siyasi ideologiyanı bölüşən müəyyən sayda insanın təşkilatlanması və siyasi mübarizəyə qoşulması deməkdir. Maraqlısı budur ki, layihənin bu müddəasına etiraz edənlər özlərinin böyük elektoratının olduğunu iddia edənlərdir.
Digər bir məsələ iki dəfə ardıcıl olaraq, parlament, prezident və ya bələdiyyə seçkilərində iştirak etməyən partiyaların dövlət qeydiyyatının ləğv edilməsi ilə bağlı təklifdir. Bu, əslində siyasi plüralizm, aktivlik və mübarizəni təşviq edən bir müddəadır.
"Siyasi partiyanın əsas məqsədi seçkilərdə iştirak etməkdir. Bu, siyasi mübarizənin ən əsas formasıdır. Yəni seçkilərdə uğursuzluğa düçar olacağını bildikləri üçün seçkiləri mütəmadi olaraq boykot edənlərə bu fürsət verilməyəcək", - deyə Aydın Hüseynov fikirlərini yekunlaşdırıb.