Türkiyəli ekspert: Bakı ilə İrəvan arasında sülh Cənubi Qafqazın qlobal nüfuzunu artıracaq
Ankara, 4 iyul, AZƏRTAC
Azərbaycan və Ermənistan arasında sülh sazişi həm də Şərqlə Qərb arasında tranzit və logistika dəhlizi kimi Cənubi Qafqazın iqtisadi çəkisinin artmasına səbəb olacaq.
AZƏRTAC xəbər verir ki, bu fikri İstanbul İbn Haldun Universitetinin beynəlxalq əlaqələr üzrə professoru Yaşar Sarı söyləyib.
Türkiyəli ekspertin sözlərinə görə, Aİ və Çin Orta Dəhliz çərçivəsində Cənubi Qafqazın potensialına maraq göstərir. Bundan başqa, “Şimal-Cənub” dəhlizi kontekstində regionun tranzit imkanları da Rusiyanı maraqlandırır.
Ekspert Ukraynada müharibənin başlamasından sonra Avropa İttifaqının siyasətində yaranan dəyişikliklərə diqqət çəkib.
İstanbul İbn Haldun Universitetinin professoru vurğulayıb: “Dünyada geosiyasi vəziyyətin dəyişməsi Aİ-ni bir sıra ölkələrə, o cümlədən Azərbaycan və Qazaxıstana qarşı qərəzli mövqedən uzaqlaşmağa, Avropa ölkələrinin öz maraqlarını nəzərə alaraq onlarla sıx dialoq qurmağa vadar edib. Bu gün biz görürük ki, Brüssel artıq Bakı ilə əlaqələrin geniş inkişafına çalışır və söhbət təkcə nəqliyyat və enerji komponentlərindən getmir. Bu, Qafqaz regionunun Qərb üçün artan əhəmiyyətinin göstəricisidir”.
Eyni zamanda, Yaşar Sarı Cənubi Qafqazla bağlı Avropa ölkələrinin mövqeyində birliyin olmamasına diqqət çəkib. O qeyd edib: “Məsələn, Fransa Ermənistana siyasi dəstək verir və İrəvanı silahla təmin etməyə hazırdır. Lakin belə görünür ki, Ermənistan hakimiyyəti Parisin imkanlarının məhdudluğunun fərqindədir. Üstəlik, Fransanın özündə gedən siyasi proseslər fonunda bu çərçivə daralır. Düşünürəm ki, İrəvanda insanlar bunu dərk edirlər. Ermənistanın inkişafının və bu ölkənin iqtisadiyyatına investisiyaların cəlb edilməsinin yeganə yolu dialoq, Azərbaycan və Türkiyə ilə münasibətlərin tezliklə normallaşmasıdır”.
Ekspert hesab edir ki, Ermənistanla qonşu dövlətlər arasında ziddiyyətlər erməni tərəfinin onlara qarşı ərazi iddialarından əl çəkməsindən sonra aradan qaldırıla bilər.
Professor vurğulayıb: “Heç kimə sirr deyil ki, bu gün İrəvanda Türkiyə və Azərbaycan torpaqlarına iddialar səsləndirilir və Ermənistan Konstitusiyasında da buna istinadlar var. Hesab edirəm ki, İrəvan Şərqi Anadoluya, eləcə də Azərbaycan ərazisinə iddia ideyasından birdəfəlik imtina etməlidir. Ermənistan hakimiyyəti üçün bu, asan addım deyil, çünki məsələn, Ağrı dağı ermənilərin “milli kodu”nun simvolu kimi qəbul edilir. Ona görə də ermənilərin özlərinin şüurunun dəyişdirilməsi vacibdir və bu proses başlayıb”.
AZƏRTAC-ın xüsusi müxbiri
Ankara
Bölmənin digər xəbərləri
