ABŞ DÖVLƏT KATİBİNİN KÖMƏKÇİSİ AZƏRBAYCAN UNİVERSİTETLƏRİNİN REKTORLARI İLƏ GÖRÜŞMÜŞDÜR
AZƏRTAC xəbər verir ki, iyunun 20-də Azərbaycan Diplomatik Akademiyasında ABŞ dövlət katibinin təhsil və mədəniyyət məsələləri üzrə köməkçisi Qoli Amerinin, akademiyanın rektoru, Azərbaycan xarici işlər nazirinin müavini Hafiz Paşayevin, habelə ölkəmizin digər aparıcı universitetlərinin rektorları və tələbələrinin iştirakı ilə “dəyirmi masa” keçirilmişdir.
Q.Ameri demişdir: “Azərbaycan Diplomatik Akademiyası yarandığı vaxtdan qarşısına qoyulmuş vəzifə və məqsədləri yerinə yetirmişdir. Azərbaycanın son üç ildə xarici səfirliklərinin sayının iki dəfə artdığını nəzərə alsaq, yüksək ixtisaslı diplomatik kadrların yetişdirilməsinə ehtiyac var”.
ABŞ diplomatı vurğulamışdır ki, Azərbaycan Prezidenti İlham Əliyevin təsdiq etdiyi Azərbaycan gənclərinin xaricdə təhsil almasına dair Dövlət proqramı ölkənin gələcəyinə böyük töhfədir.
Azərbaycan Təhsil Nazirliyi ilə imzalanmış qarşılıqlı anlaşma haqqında memorandumdan söhbət açan Qoli Ameri vurğulamışdır ki, bu sənəd iki ölkə arasında təhsil sahəsində əməkdaşlığa dəstəkdir, habelə tələbə və tədqiqatçıların səmərəli mübadiləsi üçün imkanlar açır.
Diplomatik Akademiyanın rektoru Hafiz Paşayev bildirmişdir ki, Azərbaycan Birləşmiş Ştatlarla əməkdaşlıq üçün açıqdır. Dövlət katibinin təhsil və mədəniyyət məsələləri üzrə köməkçisinin budəfəki səfəri ikitərəfli münasibətlərin inkişafı üçün yeni perspektivlər vəd edir.
######
Bölmənin digər xəbərləri
