AFFA YENİYETMƏ FUTBOLÇULARI MÜKAFATLANDIRMIŞDIR
AZƏRTAC xəbər verir ki, Avropa çempionatının ilkin seçmə mərhələsini uğurla adlayaraq elit raunda vəsiqə qazanmış 17 yaşadək futbolçulardan ibarət Azərbaycan yığmasının üzvləri AFFA tərəfindən mükafatlandırılmışlar.
Assosiasiyanın inzibati binasında keçirilən tədbirdə AFFA-nın birinci vitse-prezidenti Rauf Əliyev və baş katib Elxan Məmmədov çıxış edərək yığmanın üzvlərinə təbriklərini çatdırmışlar.
Komandanın baş məşqçisi Bernhard Lippert isə elit raundda uğurlu çıxış etmək üçün tövsiyələrini futbolçuların diqqətinə çatdırmış, göstərilən diqqətə görə AFFA rəhbərliyinə minnətdarlığını bildirmişdir.
Xatırladaq ki, U-17 Avropa çempionatının ilkin seçmə mərhələsində Bolqarıstan yığmasına 3:1 hesabı ilə qalib gəlmiş, Çernoqoriya komandası ilə 2:2 hesablı heç-heçə etmiş, qrup oyunlarına ev sahibliyi edən Polşa yığmasına isə 1:3 hesabı ilə məğlub olmuşdu.
Yığmamızın elit raunddakı rəqibləri Hollandiya, Xorvatiya və Lüksemburq komandalarıdır. U-17-nin mübarizə aparacağı 3-cü qrupun oyunları martın 19-da keçiriləcəkdir.
Bölmənin digər xəbərləri
