Azərbaycan güləşçiləri Rusiyada çempion olublar
Bakı, 12 oktyabr, AZƏRTAC
Oktyabrın 10-11-də Rusiyanın Vladiqafqaz şəhərində Olimpiya çempionu David Musulbesin şərəfinə sərbəst güləş üzrə beynəlxalq turnir keçirilib.
Azərbaycan Güləş Federasiyasından AZƏRTAC-a verilən məlumata görə, ənənəvi yarışda 16 yaşadək güləşçilər mübarizə aparıb.
15 ölkədən 300-dən artıq yeniyetmənin mübarizə apardığı turnirdə ölkəmizi U-15 milli komandanın böyük məşqçisi Emin Əzizov və məşqçi Elşad Allahverdiyevin rəhbərliyi altında təmsil edən güləşçilərdən ikisi uğurlu çıxış edib.
Avropa çempionu Elvin Necəfzadə 85 kiloqramda bütün rəqiblərinə tam üstünlüklə qalib gələrək fəxri kürsünün ən yüksək pilləsinə qalxıb.
Avropa mükafatçısı Cavanşir Süleymanov isə 44 kiloqramda eyni uğura imza atıb.
Qeyd edək ki, turnirdə III dərəcəli beynəlxalq hakim Nihad Muradov ədaləti qoruyub.
Bölmənin digər xəbərləri
