AFR-də tullantıların emal edilməsi üçün qurğular çatışmır
Berlin, 14 may, AZƏRTAC
Zibili haraya atmalı? Bu, təkcə Azərbaycan, Rusiya, Ukrayna və MDB məkanındakı başqa ölkələr üçün deyil, həm də Avropa üçün, o cümlədən Almaniya üçün aktual problemdir.
AZƏRTAC xəbər verir ki, AFR-də tullantıların çeşidlənməsi və utilizasiyası üçün qurğular çatışmır. Çin Almaniyadan tullantılar idxalından demək olar ki, tamamilə imtina edəndən sonra bu məsələ xüsusilə kəskinləşib. Lakin ekspertlər əmindirlər ki, zibil qalaqlarının get-gedə artması Almaniyada zibil emalı sahəsinin inkişafı üçün yaxşı şans ola bilər.
Əvvəl bu ölkə Çinə və Honkonqa külli miqdarda plastik maddə tullantıları göndərirdi. Çində həmin tullantılardan oyuncaq rezin “ördəklər” və “flis” adlı sintetik parçadan sviterlər hazırlanması üçün istifadə edilirdi. Bu sövdə AFR-in də xeyrinə idi: asiyalı tərəfdaşlar tullantı plastikin hər tonuna görə Almaniyada tullantıların emalı ilə məşğul olan şirkətlərlə müqayisədə təxminən 20 avro çox ödəyirdilər. İndi buna son qoyulub - alman zibili daha Pekinə lazım deyil. Bu səbəbdən indi Flansburq ilə Boden gölü arasındakı ərazidə yerləşən zibilxanalarda təkcə plastik maddələr tullantısı deyil, kağız, köhnə tekstil tullantıları və metal qırıntıları da yığılıb qalır. Ölkədə zibilin utilizasiyası üçün qurğular çatışmır.
Çinin zibil idxalından imtina etmək barədə qərarı gözlənilməz olmayıb. Tezliklə Almaniyada tullantısız istehsal iqtisadiyyatı inkişaf edəcək və bu proses təkcə plastik maddələr emalı sahəsi ilə məhdudlaşmayacaq. Bunun üçün həm plastik tullantıların toplanmasını və emalını daha səmərəli üsulla təşkil etmək, həm də qablaşdırma malları istehsal etmək lazım gələcək.
2018-ci ilin sonunadək Aİ-də tullantıların utilizasiyası üzrə kvotaların dəyişdirilməsi nəzərdə tutulur: indiyə qədər sintetik materialların 36 faizi təkrar emal edilirdisə, 2020-ci ilə qədər bu göstərici tədricən artırılaraq 63 faizə çatdırılmalıdır. Bu, zibil emalı sənayesi üçün əsl çağırışdır!
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
