AFR SƏFİRİ BAKI SLAVYAN UNİVERSİTETİNİN QONAĞI OLMUŞDUR
Bakı Slavyan Universitetinin mətbuat xidmətindən AZƏRTAC-a verilən məlumata görə, BSU-da keçirilən ənənəvi “səfir saatı”nın növbəti qonağı Almaniya Federativ Respublikasının ölkəmizdəki səfiri Per Kristofer Stançina olmuşdur.
BSU-nun rektoru, AMEA-nın müxbir üzvü Kamal Abdullayev qonağa bu ali məktəbin strukturu, fəaliyyəti və maddi-texniki bazası barədə məlumat vermişdir.
O vurğulamışdır ki, BSU-nun geniş əhatəli xarici əlaqələri sırasında Almaniyanın bəzi universitetləri ilə münasibətləri də qeyd etmək olar. Məsələn, Maynts şəhərinin universiteti ilə “Kitabi-Dədə Qorqud” və “Niberlunqlar haqqında dastan” eposlarının müqayisəli öyrənilməsi istiqamətində müştərək elmi-tədqiqat işinin aparılması barədə beş il müddətinə müqavilə bağlanmışdır. Bununla əlaqədar, Bakıda və Mayntsda görüşlər, simpoziumlar keçirilir. Alman müəlliflərinin əsərləri bilavasitə orijinaldan Azərbaycan dilinə tərcümə edilir. Koseriunun “Ümumi dilçiliyə giriş” dərsliyi BSU-nun nəşriyyatında çap edilmişdir. Hazırda Nitsşe, Humholdt, Yunq, Freyd və başqa müəlliflərin əsərlərinin Azərbaycan dilinə tərcümələri üzərində iş gedir.
Rektor çıxışının sonunda bildirmişdir ki, bu ildən etibarən BSU-da Roman-german filologiyası şöbəsi açılmışdır. Tübingen universiteti ilə bağlanmış müqaviləyə görə, bu ali məktəbin 12 tələbəsi Bakı Slavyan Universitetinin yay məktəbində “Azərbaycanşünaslıq” ixtisası üzrə biliklərini təkmilləşdirəcəklər.
Səfir səmimi qəbul və maraqlı məlumat üçün minnətdarlığını bildirmiş, sonra tələbələrin suallarına cavab vermişdir.
Bölmənin digər xəbərləri
