ELM VƏ TƏHSİL
AMEA-nın əməkdaşları Belarus Milli Elmlər Akademiyasının kompüter şəbəkəsi ilə tanış olublar
Bakı, 21 noyabr, AZƏRTAC
Noyabrın 21-də AMEA-nın İnformasiya Texnologiyaları İnstitutunun şöbə müdiri, texnika üzrə fəlsəfə doktoru Gülnarə Nəbibəyova və baş mütəxəssis Əfruz Qurbanova Minskdə keçirilən “RINTI-2019” XVIII beynəlxalq konfransı çərçivəsində Belarus Milli Elmlər Akademiyasının Birləşmiş İnformatika Problemləri İnstitutunun inkişaf etmiş “BASNET” elmi kompüter şəbəkəsi ilə tanış olublar.
İnformasiya Texnologiyaları İnstitutundan AZƏRTAC-a bildirilib ki, azərbaycanlı alimlərə “BASNET” barədə məlumat verilib. “BASNET”in rəhbəri Yuzaf Kostyukeviç qeyd edib ki, elmi kompüter şəbəkəsi həm Belarus Milli Elmlər Akademiyasının institutlarına, həm də elm, təhsil və büdcə sektorlarına aid digər təşkilatlara şəbəkə xidmətləri göstərir. Şöbə müdiri bildirib ki, “BASNET” şəbəkəsi Belarus Respublikasında GEANT-ın ümumavropa elmi şəbəkəsi vasitəsilə qlobal kompüter şəbəkələrinə avtonom girişi təmin edən yeganə şəbəkədir.
Daha sonra Gülnarə Nəbibəyova AMEA-nın İnformasiya Texnologiyaları İnstitutunun “AzScienceNet” elm kompüter şəbəkəsinin fəaliyyəti haqqında məlumat verib. Bildirib ki, “AzScienceNet” elm kompüter şəbəkəsi 2016-cı ildən Avropa üzrə bütün elm və təhsil qurumlarına xidmət göstərən nəhəng elektron infrastruktur olan GEANT-a qoşularaq Azərbaycanı bu qurumda təmsil edir.
“AzScienceNet”in ölkədə elm və təhsil sahələrinin inteqrasiyasında böyük imkanlara malik olduğunu söyləyən G.Nəbibəyova bildirib ki, AMEA-nın elmi tədqiqat müəssisələri ilə yanaşı, artıq ölkənin 18 təhsil müəssisəsi də institutun “AzScienceNet” şəbəkəsi və Data Mərkəzin xidmətlərindən yararlanmaq imkanı əldə ediblər.
G.Nəbibəyova “BASNET” əməkdaşlarını 2020-ci ildə ölkəmizdə keçiriləcək “5-ci Şərq tərəfdaşlığı e-infrastrukturu konfransı”na dəvət edib.