Bakı, 12 oktyabr, AZƏRTAC

AMEA-nın İctimai Elmlər Bölməsinin Elmi şurasının növbəti iclası keçirilib.

Bu barədə AZƏRTAC-a AMEA-dan məlumat verilib. Bildirilib ki, iclası AMEA-nın vitse-prezidenti vəzifəsini icra edən, İctimai Elmlər Bölməsinin Elmi şurasının sədri akademik Gövhər Baxşəliyeva açaraq gündəlikdəki məsələləri diqqətə çatdırıb.

Gövhər Baxşəliyeva İctimai Elmlər Bölməsi üzrə 2022-ci tədris ili üçün fəlsəfə və elmlər doktoru üzrə dissertantura və doktoranturaya qəbulun nəticələri haqqında məlumat verib. Akademik, həmçinin son illərdə bu sahədə xarici dil imtahanları ilə bağlı yaranmış problemlərdən söz açıb.

İclasda bölmənin elmi-tədqiqat müəssisələrinin fəlsəfə və elmlər doktoru hazırlığı üzrə dissertantura və doktoranturasına qəbul olmuş namizədlərin mövzuları geniş müzakirə edilib.

Akademik Gövhər Baxşəliyeva İctimai Elmlər Bölməsinin müəssisələri üzrə 2023-cü il üçün dissertantura və doktoranturaya qəbul planına dair verilmiş təklifləri də diqqətə çatdırıb. Bölmə sədri qəbul planı ilə əlaqədar elmi-tədqiqat müəssisələrinə mütəxəssislərin yetişdirilməsinə ehtiyac duyulan ixtisaslara daha çox yer ayırmağı tövsiyə edib.

Alim ölkə rəhbərinin “Azərbaycan Respublikasında 2023-cü ilin “Heydər Əliyev İli” elan edilməsi haqqında” 2022-ci il 29 sentyabr tarixli Sərəncamından irəli gələrək İctimai Elmlər Bölməsinin və müəssisələrinin qarşısında duran vəzifələrdən söz açıb. Sərəncamın icrasına uyğun olaraq, keçiriləcək beynəlxalq və respublika səviyyəli elmi konfranslar, sessiyalar, seminarlar, həmçinin ulu öndər Heydər Əliyevin həyat və yaradıcılıq irsinə dair kitab və monoqrafiyaların, sənədlər toplusunun hazırlanması, tarixi, fəlsəfi görüşləri və s. bağlı materialların KİV-də işıqlandırılması istiqamətində verilmiş təkliflər iclas iştirakçılarının nəzərinə çatdırılıb.

Gövhər Baxşəliyeva, həmçinin Prezidentin “Azərbaycan Respublikasında 2022-ci ilin “Şuşa İli” elan edilməsi haqqında” 2022-ci il 5 yanvar tarixli Sərəncamına toxunub, bu istiqamətdə İctimai Elmlər Bölməsinin müəssisə və təşkilatlarında görülmüş və ilin sonuna kimi görüləcək işləri tədbir iştirakçılarının diqqətinə çatdırıb. Vurğulayıb ki, təməli 1752-ci ildə Qarabağ xanı Pənahəli xan tərəfindən qoyulan Şuşa şəhəri xalqımızın ictimai-siyasi, ədəbi, mədəni həyatında hər zaman mühüm rol oynayıb, öz füsunkar gözəlliyi ilə daim bura gələn qonaqların diqqətini cəlb edib. Ötən üç əsrdə Şuşada xalqımızın mədəniyyətini əks etdirən bir çox tarixi memarlıq abidələri tikilib, lakin onların xeyli hissəsi 1992-ci ildə erməni işğalından sonra dağıdılıb. G.Baxşəliyeva Müzəffər Ali Baş Komandan İlham Əliyevin rəhbərliyi ilə Azərbaycan Ordusu tərəfindən Şuşanın işğaldan azad edilməsindən sonra bütün Qarabağda olduğu kimi, Şuşa şəhərində də geniş quruculuq işlərinin həyata keçirildiyini söyləyib, şəhərin tarixi, arxeologiyası, etnoqrafiyası, memarlığı, iqtisadiyyatı, görkəmli şəxsiyyətləri ilə bağlı nəşrlərin hazırlanaraq bir neçə dildə yerli və beynəlxalq ictimaiyyətə təqdim edilməsinin vacibliyini vurğulayıb.

İclasda, həmçinin bir sıra elmi-təşkilati və kadr məsələləri müzakirə olunub. Elmi şuranın qərarı ilə AMEA-nın Abbasqulu Ağa Bakıxanov adına Tarix İnstitutunun Elmi şurasının tərkibində qismən dəyişiklik edilməsi və AMEA-nın akademik Ziya Bünyadov adına Şərqşünaslıq İnstitutunda Şərq ölkələrinin tarixşünaslığı şöbəsinin yaradılması barədə Rəyasət Heyəti qarşısında vəsatət qaldırılıb.

Akademik Gövhər Baxşəliyeva Nazirlər Kabinetinin “Azərbaycan Milli Elmlər Akademiyasının strukturunun və işçilərinin say həddinin təsdiq edilməsi haqqında” 2022-ci il 30 sentyabr tarixli qərarına müvafiq olaraq, Elm Tarixi İnstitutunun ləğv edilməsi ilə əlaqədar sözügedən müəssisənin bir qrup əməkdaşının akademiyanın digər elmi-tədqiqat müəssisələrinə yerləşdirilməsi məsələsini də müzakirə edib.

Bundan əlavə, Tarix İnstitutunun kiçik elmi işçisi Samirə Hadiyevanın doktorantura təhsilini Türkiyənin Qara dəniz Texniki Universitetində davam etdirməsi məqsədilə Türkiyəyə ikiillik ezam olunması məsələsinə baxılıb. Həmçinin AMEA-nın Fəlsəfə və Sosiologiya İnstitutunun iki əməkdaşının vəzifəsində dəyişiklik edilib.

İclasda görkəmli tarixçi alim, Əməkdar müəllim, AMEA-nın müxbir üzvü Zəhmət Şahverdiyevin 80 illiyi ilə əlaqədar AMEA-nın Rəyasət Heyəti qarşısında vəsatət qaldırılıb.

Sonda akademik Gövhər Baxşəliyeva bir sıra məsələlərlə əlaqədar müəssisələrin rəhbərlərinə tapşırıq və tövsiyələrini verib.