AMERİKA TƏLƏBƏLƏRİ AZƏRBAYCAN DİLİNİ ÖYRƏNƏCƏKLƏR
AZƏRTAC xəbər verir ki, iyunun 20-də ABŞ dövlət katibinin təhsil və mədəniyyət məsələləri üzrə köməkçisi Qoli Ameri Azərbaycan Dillər Universitetinin rektoru Səməd Seyidovla birgə mətbuat konfransında demişdir: “Azərbaycan Dillər Universitetində Azərbaycan dilini öyrənəcək Amerika tələbələrinin ilk qrupu Bakıya 2009-cu ilin yayında göndəriləcəkdir”. Qoli Ameri bildirmişdir ki, bu təşəbbüs Azərbaycan mədəniyyətinin öyrənilməsi baxımından olduqca vacibdir və ona hörmətin təsdiqidir. Onun sözlərinə görə, amerikalıların əcnəbi dilləri öyrənmələri proqramı ABŞ Prezidenti Corc Buşun sərəncamına müvafiq həyata keçirilir. Hazırda amerikalılar fars, Koreya, türk, hind və digər dilləri öyrənirlər.
Azərbaycan Prezidenti İlham Əliyevin Fərmanı ilə təsdiq edilmiş respublika gənclərinin xaricdə təhsil almaları proqramını yüksək qiymətləndirən xanım Ameri bir çox tələbələrin məhz ABŞ-da təhsil alacaqlarından məmnun qaldığını bildirmişdir.
Səməd Seyidov öz növbəsində bildirmişdir ki, ABŞ Dövlət Departamenti ilə Azərbaycan Təhsil Nazirliyi arasında imzalanmış qarşılıqlı anlaşma haqqında memorandum Azərbaycan və Amerika Universitetlərinin yaxınlaşmasında mühüm rol oynayacaqdır.
Səməd Seyidov vurğulamışdır ki, Azərbaycan Dillər Universitetinin ABŞ-ın İndiana Universiteti ilə həyata keçirdikləri birgə layihələrə müvafiq olaraq, Amerika tələbələri Azərbaycana yay kurslarına gələcək, Azərbacan tələbələri isə İndiana Universitetində təhsil alacaqlar.
O demişdir: “Bu, ABŞ ilə Azərbaycan arasında təhsil sahəsində genişlənməkdə olan əlaqələrin göstəricisidir”.
Rektor universitetdə fəaliyyət göstərən Amerika Mərkəzini ilin axırınadək xeyli genişləndirmək niyyətindən danışaraq demişdir ki, mərkəz həm amerikalı, həm də azərbaycanlı tələbələr üçün əlçatan olacaqdır.
######
Bölmənin digər xəbərləri
