AMERİKALI MUSİQİÇİLƏRİN ŞƏKİ VƏ ZAQATALADAKI KONSERTLƏRİ UĞURLU KEÇMİŞDİR
AZƏRTAC xəbər verir ki, ABŞ səfirliyinin dəvəti ilə ölkəmizdə qastrol səfərində olan Amerikanın “Poetica Muzica” triosu bölgələrə səfər proqramına uyğun olaraq, Şəki və Zaqatalada konsertlər vermişdir.
Şəkidə konsertdən əvvəl “Poetica Muzica” qrupunun üzvləri musiqi texnikumunda tələbələrlə görüşmüş, ustad dərsləri keşmişlər.
Şəhər icra hakimiyyəti başçısının müavini Zərinə Cavadova ABŞ səfirliyi ilə əməkdaşlığın uğurla inkişaf etdiyini, belə tədbirlərin keçirilməsinin artıq ənənə halını aldığını bildirmiş, 2007-ci ilin iyulunda Amerikanın “Dina Preston kantri” musiqi qrupunun Şəki musiqisevərləri qarşısında böyük müvəffəqiyyətlə çıxış etdiyini xatırlatmışdır.
ABŞ səfirliyinin ictimai əlaqələr üzrə nümayəndəsi Dmitri Taraxovski qonaqpərvərliyə, yaradılan şəraitə görə şəhər rəhbərliyinə və musiqisevərlərə minnətdarlığını bildirmişdir.
“Poetica Muzica” triosunun çıxışları Şəki tamaşaçıları tərəfindən hərarətli alqışlarla qarşılanmışdır. Konsertin sonunda qonaqlara şəhər rəhbərliyi adından fəxri fərman və hədiyyələr təqdim edilmişdir.
Zaqatala incəsənət məktəbinin zalında keçirilən konsert proqramı da müvəffəqiyyətlə keçmişdir.
Bölmənin digər xəbərləri
