Ankarada 8 Noyabr – Zəfər Günü münasibətilə rəsmi qəbul keçirilib
Ankara, 7 noyabr, AZƏRTAC
Azərbaycanın Türkiyədəki səfirliyi və diplomatik nümayəndəliyimizin nəzdində Silahlı Qüvvələrin Hərbi Attaşelik Aparatı 8 Noyabr - Zəfər Günü münasibətilə Ankarada rəsmi qəbul keçirib.
AZƏRTAC xəbər verir ki, Quru Qoşunlar Məktəbində keçirilən mərasimdə şəhid ailələri və qazilər, rəsmi şəxslər, millət vəkilləri, Türkiyə Silahlı Qüvvələrinin ali vəzifəli şəxsləri, qardaş ölkə ictimaiyyətinin görkəmli nümayəndələri iştirak ediblər.
Əvvəlcə şəhidlərimizin əziz xatirəsi bir dəqiqəlik sükutla yad olunub.
Sonra Azərbaycan və Türkiyənin Dövlət himnləri səsləndirilib.
Azərbaycanın Türkiyədəki səfirliyinin hazırladığı “Tarix yazan Ordu” tarixi-sənədli filmi nümayiş olunub.
Çıxışlarda diqqətə çatdırılıb ki, Vətən müharibəsinin ilk anlarında Türkiyə Prezidenti Rəcəb Tayyib Ərdoğanın Türkiyənin Azərbaycanın yanında olması barədə Bəyanatı xalqımızın inam və mübarizə əzmini zirvələrə qaldırıb.
Diqqətə çatdırılıb ki, Azərbaycan Prezidenti İlham Əliyev ilə Türkiyə Prezidenti Rəcəb Tayyib Ərdoğan dostluq və qardaşlıq münasibətləri iki doğma xalqın və ölkə arasındakı münasibətlərin Şuşa Bəyannaməsi əsasında müttəfiqlik səviyyəsinə ucalmasına öz töhfəsini verib. Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük Vətən savaşında qazandığı parlaq Qələbə Azərbaycan və Türkiyə başda olmaqla bütün türk dünyasının qürur mənbəyi kimi səciyyələndirilib.
Ümummilli lider Heydər Əliyevin “Bir millət, iki dövlət” kəlamını xatırladan nazir Hulusi Akar bu ifadənin heç vaxt unudulmamalı olduğunu vurğulayaraq Ermənistanın Azərbaycana qarşı işğalçılıq siyasətinin otuz il davam etdiyini, ATƏT-in Minsk Qrupu daxil olmaqla beynəlxalq təşkilatların bu təcavüzə göz yumduğunu, nəhayət Azərbaycan xalqının ayağa qalxaraq böyük bir inamla öz torpaqlarını işğaldan azad etdiyini bildirib. Nazir deyib: “Azərbaycanlı can qardaşlarımızın haqlı davalarında hər zaman yanlarında olduq, bundan sonra da eyni şəkildə yanlarında olmaqda davam edəcəyik. Həm meydanda, həm də danışıqlarda bütün platformalarda azərbaycanlı qardaşlarımızın haqqını, hüququnu dilə gətirdik, dilə gətirməkdə də davam edəcəyik”.
Türkiyə və Azərbaycanın Qafqaz bölgəsində sülh, sabitlik və inkişaf yaratmaq cəhdlərindən danışan nazir Hulusi Akar deyib: “Şuşa Bəyannaməsi əlaqələrimizdə atılan ən mühüm addımlardan biri olub. Bu bəyannamədə birliyimizin, qardaşlığımızın və ümumi gələcək hədəflərimizin göstəriciləri yer alıb. Bu bəyannamə çərçivəsində regionda davamlı sülh və əmin-amanlığın yaradılması üçün biz də mümkün olan hər addımı atacağımızı bildirmişik. Azərbaycan və Türkiyənin birlikdə Ermənistana uzatdığı sülh əlinin mahiyyətini qarşı tərəfin əvvəlcə başa düşməsi və sonra lazımi addımların atılması çox vacibdir. Hər kəs, xüsusilə də Ermənistan görməlidir ki, bu addım region üçün vacibdir və bu yolla Qafqaz sülh və sabitlik bölgəsinə çevrilə bilər”.
Düşmənin Azərbaycana qarşı işğalçılığa başlayarkən xalqımızın Vətənə və torpağa bağlılığını, eləcə də Türkiyə ilə qardaşlığımızı nəzərə almamaqla böyük səhvə yol verdiyinin vurğulandığı çıxışlarda Azərbaycan ərazilərinin işğalı zamanı baş verən acı hadisələri, o cümlədən Xocalı soyqırımının dəhşətləri, Şuşanın süqutu xatırlanıb. Bildirilib ki, o dövrdə Azərbaycan Silahlı Qüvvələri yox səviyyəsində idi. Lakin zaman və düzgün siyasət hər şeyi öz axarına saldı. Qafqaz İslam Ordusu şəhidlərinin məzarlarını böyük bir ehtiramla qoruyan Azərbaycan xalqı müstəqilliyimizin bərpasının ilk anlarında Türkiyə ilə əlaqələri genişləndirdi və iki qardaş ölkə birgə inkişaf yolu seçdi.
Çıxışlarda Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun qazandığı rəşadətli Qələbənin yüksək nəticələrindən danışılaraq əminliklə qeyd olunub ki, böyük Qarabağ Zəfəri əbədiyyətə qədər xalqlarımızın iftixar qaynağı kimi qorunacaq.
Şəhidlərimizə Allahdan rəhmət, qazilərimizə şəfa diləyən çıxışçılar bildiriblər ki, dövlət, vətən və xalq qəhrəman övladlarımızın fədakarlığını heç zaman unutmayacaq.
Mərasim zəngin musiqili-bədii proqramla davam edib.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
