Ankara, 23 may, AZƏRTAC

Mayın 23-də Türkiyənin paytaxtı Ankara şəhərində Türkiyə Barolar Birliyinin və Azərbaycan Respublikasının Vəkillər Kollegiyasının birgə təşkilatçılığı ilə Türk dünyası Vəkillər kollegiyalarının zirvə görüşü keçirilir.

AZƏRTAC xəbər verir ki, tədbirdə Türkiyə və Azərbaycanla yanaşı, Qazaxıstan, Qırğızıstan, Özbəkistan, Türkmənistan, Şimali Kipr Türk Cümhuriyyətinin Vəkillər kollegiyalarının rəhbərliyi və nümayəndə heyətləri iştirak edir.

Görüşdə Azərbaycan Respublikasının Vəkillər Kollegiyasının sədri Anar Bağırov çıxış edib. O bildirib ki, bugünkü zirvə toplantısı Türkiyə Barolar Birliyinin sədri Erinç Sağkanla birgə aparılan razılıq əsasında baş tutub: “İlk dəfə olaraq bütün Türk dünyasının Vəkillər kollegiyalarının rəhbərləri bu görüşə qoşuldu. Fürsətdən istifadə edib bütün həmkarlarıma öz adımdan, Azərbaycan vəkil korpusu adından dərin minnətdarlığımı bildirirəm. Böyük uğurumuz isə türkmənistanlı həmkarlarımızın da ilk dəfə görüşə qatılmasıdır. Məlum olduğu kimi, bizi birləşdirən bir çox dəyərlər var. Bu gün həm tarixi, həm mədəni, həm də iqtisadi dəyərlər bizi birləşdirir. Nəzərə almaq lazımdır ki, bugünkü həyat Türk dövlətlərinin bizdən başqa dostlarının olmadığını sübut edir. Bu, bir reallıqdır. Azərbaycan Respublikası olaraq, biz bunun dəfələrlə şahidi olmuşuq. Bilirsiniz ki, uzun illər ərzində Azərbaycan torpaqları işğal altında idi. Torpaqlarımızın 20 faizi Ermənistan tərəfindən işğal olunmuşdu, bir milyona yaxın qaçqın və məcburi köçkünlərimiz öz ata-baba yurdlarından didərgin düşmüşdülər. BMT-nin çıxardığı qətnamələr icra olunmurdu. Vətən müharibəsi zamanı ərazilərimizi düşməndən azad etdik. Hazırda Azərbaycan xalqı qalib və qürurlu xalq kimi tanınır. Bunların hamısı asan yolla olmadı, biz çox əziyyətlər çəkdik, İnsanlarımızın haqları pozuldu. Ancaq bizə ən böyük dəstək göstərən kim oldu? Əlbəttə, Türkiyə dövləti! Biz isə bunu heç vaxt unutmayacağıq. Bu, bizim tariximizdə əbədi olaraq qalacaq. Dostluğumuz sözdə yox, əməldə öz təsdiqini tapdı.

Türkiyə Respublikasının banisi Mustafa Kamal Atatürkün dediyi kimi, “Azərbaycanın kədəri Türkiyənin kədəridir, Azərbaycanın sevinci Türkiyənin sevincidir”. Təbii ki, Azərbaycan üçün də bu belədir. Xalqımızın Ümummilli Lideri Heydər Əliyevin söylədiyi kimi, biz “bir millət, iki dövlət”ik. Ancaq artıq biləsiniz ki, bu düstur daha da genişlənir. Belə ki, 2009-cu ildə Azərbaycanın Naxçıvan şəhərində Türkdilli Dövlətlərin Əməkdaşlıq Şurası yaradıldı. 2021-ci ildən etibarən isə bu Şura Türk Dövlətləri Təşkilatına çevrilib. Artıq bu inteqrasiya prosesləri, birlik daha da güclənib, təşkilat formalaşıb. Bütün Türk respublikalarının dövlət başçıları bu təşkilatda keçirilən tədbirlərdə iştirak edir. Hazırda əməkdaşlıq bütün sahələrdə davam edir. Təbii ki, vəkillik sahəsi də kənarda qala bilməzdi. Biz vəkillər cəmiyyətlərimiz üçün çox önəmliyik. Bizim peşə olmadan ədalət mühakiməsi, insan haqlarının qorunması, hüquqi dövlətin qurulması qeyri-mümkündür. Bizim iş birliyimiz, bu görüş, apardığımız müzakirələrimiz, qəbul etdiyimiz qərarlar nəticə etibarilə yalnız və yalnız bir hədəfə, bir məqsədə xidmət edir”.

Ramin Abdullayev

AZƏRTAC-ın xüsusi müxbiri

Ankara