Ankarada Qafqaz İslam Ordusu qəhrəmanlarının xatirəsi anılıb
Ankara, 17 sentyabr, AZƏRTAC
Ankara Ticarət Palatası Şurasının binasında “Qafqaz İslam Ordusu və Ənvər paşa” mövzusunda tədbir keçirilib.
AZƏRTAC xəbər verir ki, tədbirin təşkilatçıları qismində Türkiyə - Azərbaycan Dostluq, Əməkdaşlıq və Həmrəylik Fondu (TADİV), Ankara Ticarət Palatası, Türk Dünyası Parlamentarilər Fondu (TDPV) və Azərbaycanın Türkiyədəki səfirliyi çıxış edib.
Tədbir iştirakçıları Türkiyə və Azərbaycan şəhidlərinin ruhlarına dualar oxuyublar. Sonra Qafqaz İslam Ordusu haqqında film nümayiş olunub.
Türk Dünyası Parlamentariləri Fondunun rəhbəri Abdulla Çalışkan Bakının bolşevik və daşnaklardan azad edilməsini Osmanlı ordusunun Birinci Dünya müharibəsi dövründə qazandığı üç böyük qələbədən biri adlandırıb. “Qafqaz İslam Ordusunun keçdiyi şərəfli yol haqlı olaraq Çanaqqala və Kut əl-Əmər döyüşləri iştirakçılarının şücaətləri ilə eyni sıradadır”, - deyə Abdulla Çalışkan bildirib.
TDPV rəhbəri vurğulayıb ki, türk xalqlarının birliyinin gücü qarşısında heç bir düşmən dura bilməz. Məhz buna görə də Qafqaz İslam Ordusunun qəhrəmanlarının şücaətini xatırlamaq, yeni nəsilləri vətənpərvərlik və dostluq ruhunda tərbiyə etmək vacibdir.
Ankara Ticarət Palatasının İdarə Heyətinin rəhbəri Gürsel Baran çıxışında qeyd edib ki, Türkiyə və Azərbaycan xalqlarını ortaq tarixi-mədəni köklər birləşdirir. İki ölkə liderlərinin uğurlu və düşünülmüş siyasəti “Bir millət, iki dövlət” kəlamı nöqteyi-nəzərindən sıx əməkdaşlığın rəhni oldu.
Daha sonra çıxış edən TADİV-in rəhbəri Aygün Attar Azərbaycanın köməyinə gələn Ənvər paşanın komandanlığı altındakı ordunun tarixi rolunu diqqətə çatdırıb.
O deyib ki, o dövrdə Osmanlı dövlətinin üzləşdiyi çətinliklərə və problemlərə baxmayaraq, qətiyyət nümayiş etdirilib və qardaş Azərbaycan xalqına kömək etmək üçün ordunun formalaşmasına qərar verilib.
“106 il bundan əvvəl Bakını işğaldan azad edən Qafqaz İslam Ordusu əsgərlərinin şücaəti türk və Azərbaycan xalqlarının sarsılmaz dostluğu üçün möhkəm bünövrə formalaşdırıb”, - deyə A.Attar bildirib.
Türkiyə-Azərbaycan parlamentlərarası dostluq qrupunun rəhbəri Şamil Ayrım Azərbaycanla sülh müqaviləsinin imzalanmasını müxtəlif bəhanələrlə ləngitməyə çalışan Ermənistanın mövqeyinə diqqət çəkib.
“ATƏT-in Minsk qrupunun həmsədrləri 30 il ərzində danışıqlar prosesini irəli apara və Azərbaycanın işğal olunmuş torpaqlarının azad edilməsi gününü yaxınlaşdıra bilmədilər. Nəticədə Azərbaycan öz gücü sayəsində tarixi ədaləti bərpa etdi”, - deyən Ş.Ayrım ATƏT-in Minsk qrupunun ləğv olunmasına çağırış edib.
Türkiyəli deputat Prezident İlham Əliyevin qonşu dövlətlərə qarşı ərazi iddiaları ilə bağlı sənədə istinadın yer aldığı Ermənistan Konstitusiyasının dəyişdirilməsinin zəruriliyi ilə bağlı bəyanatının əsaslı olduğunu qeyd edib.
Tədbir çərçivəsində 1918-ci ildə Azərbaycanda baş verən hadisələrə həsr edilmiş sərgi də təşkil olunub.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
