“Anna Axmatova və Şərq” monoqrafiyası çapdan çıxıb
Bakı, 14 may, AZƏRTAC
Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunun aparıcı elmi işçisi, filologiya üzrə fəlsəfə doktoru Aynur Nəcəfovanın “Anna Axmatova və Şərq” monoqrafiyası nəşr olunub.
Əlyazmalar İnstitutundan AZƏRTAC-a bildiriblər ki, kitabın baş elmi məsləhətçisi və ön sözün müəllifi bu elm müəssisəsinin direktoru, akademik Teymur Kərimli, elmi redaktoru Bakı Dövlət Universitetinin dünya ədəbiyyatı kafedrasının müdiri, professor Cəlil Nağıyevdir.
Nəşrdə XX əsr rus ədəbiyyatının tanınmış nümayəndəsi, “gümüş dövr”ün məşhur şairi Anna Axmatova və onun müxtəlif çalarlara malik zəngin yaradıcılıq yolu haqqında məlumat verilir.
Eyni zamanda, A.Axmatovanın əsərlərində qədim ənənələrə malik Şərq ədəbiyyatının təsiri, onun bu tükənməz söz xəzinəsindən bəhrələnməsi, Asiya və Afrika xalqlarının poeziya nümunələrindən etdiyi tərcümələr, müasir Şərq şairlərinin yaradıcılığına təsiri və bu kimi yeni məsələlər araşdırılır.
Bölmənin digər xəbərləri
