ANTİAZƏRBAYCAN TƏBLİĞATI APARAN QÜVVƏLƏR CİDDİ CƏZALANDIRILMALIDIRLAR
İCTİMAİ TƏŞKİLATLARIN VƏ İCTİMAİYYƏT
NÜMAYƏNDƏLƏRİNİN AZƏRTAC-A GÖNDƏRDİKLƏRİ
BƏYANATIN ƏSAS TƏLƏBİDİR
Biz – Cəlilabad rayonunun ağsaqqalları, ictimai təşkilatların və ictimaiyyətin nümayəndələri Azərbaycan Prezidenti Heydər Əliyevin uğurlu daxili və xarici siyasətini ürəkdən bəyənir, müdrik rəhbərimizin titanik fəaliyyəti nəticəsində ölkəmizin mövqeyinin gündən-günə möhkəmləndiyi ilə fəxr edir və onun işıqlı ideyalarına sədaqətli olduğumuzu bir daha bəyan edirik.
Azərbaycan xalqının bəxti onda gətirib ki, çətin keçid dövründə ölkəmizə Heydər Əliyev kimi müdrik və uzaqgörən siyasətçi və dövlət xadimi rəhbərlik edir. Möhtərəm Prezidentimizin yorulmaz fəaliyyəti, ən çətin məqamlarda həlledici qərar qəbul etmək məharəti və xalqla birliyi dəfələrlə ölkəmizi qardaş qırğınından xilas etmiş, respublikamızda vətəndaş həmrəyliyinin və ictimai-siyasi sabitliyin bərqərar edilməsinə möhkəm zəmin yaratmışdır. Azərbaycanın xaosdan siyasi sabitliyə, tənəzzüldən tərəqqiyə, etnik pərakəndəlikdən milli birliyə qovuşması, beynəlxalq miqyasda etibarlı nüfuz qazanması yalnız Heydər Əliyev zəkasının və uzaqgörənliyinin nəticəsidir.
Cənab Heydər Əliyev əhalinin digər təbəqələri kimi, ağsaqqallara, qadınlara, ictimai təşkilatların nümayəndələrinə də həmişə yüksək qiymət vermişdir. Biz əsl qiymətimizi məhz möhtərəm Prezidentimizin hakimiyyətdə olduğu dövrdə almışıq. Cəlilabad rayonunun ağsaqqalları, qadınları, ictimai təşkilatların nümayəndələri ölkəmizin ən ağır vaxtlarında həmişə cənab Heydər Əliyevlə eyni mövqedə olmuş, rəhbərin bütün çağırışlarına əməli işlə cavab vermiş, gənclərin dövlətçilik ideyalarına sədaqət ruhunda böyüməsi üçün əllərindən gələni etmişdir.
Ancaq xalqımıza əzab-əziyyətdən başqa heç nə bəxş etməyən dağıdıcı müxalifətin əlində gülünc oyuncağa çevrilən, siyasi möhtəkirlik, şəxsi ambisiya və ölkəni parçalamaq amalı ilə yaşayan “Yeni Müsavat”, “Hürriyyət”, ”Azadlıq” qəzetləri ümummilli liderimizin səhhəti barədə böhtan yazıları ilə ictimai çaşqınlıq yaratmağa cəhd göstərirlər. Xüsusən son vaxtlar böhtan kampaniyasını daha da gücləndirərək, mətbuat səhifələrində milli mənəvi dəyərlərimizə zidd olan təhqiramiz ifadələr işlədir, əxlaqsızlıq edir və özlərinin çürük mənəviyyatı ilə cəmiyyətin nifrətinə səbəb olurlar. Müxalifət qəzetləri demokratik prinsiplərlə bir araya sığmayan seçkiqabağı təşviqat üsullarına əl atır, prezidentliyə namizədliyi qeydə alınmış dövlətimizin başçısı barədə adi əxlaq qaydalarına, etik normalara və mənəvi dəyərlərə zidd olan yazılar dərc edirlər.
Halbuki Azərbaycan Respublikası Cinayət Məcəlləsinin 323-cü maddəsinə əsasən kütləvi çıxışlarda və ya kütləvi informasiya vasitələrində ölkə başçısının şərəf və ləyaqətini alçaltmaq cinayət məsuliyyəti yaradır.
Biz eyni zamanda qeyd edirik ki, zəngin tarixi keçmişə malik olan Azərbaycan-Türkiyə münasibətləri cənab Heydər Əliyevin müstəsna şəxsi xidmətləri nəticəsində daha da inkişaf etmiş və yeni mərhələyə qədəm qoymuşdur. Buna baxmayaraq, Azərbaycandakı müxalif qüvvələrə havadarlıq edən Türkiyənin “Star” televiziyasının və eyniadlı qəzetin möhtərəm Prezidentimizin səhhəti ilə bağlı yaydığı yalan və qərəzli xəbərlər dövlətlərimiz və xalqlarımız arasında narazılıq toxumu səpmək məqsədi güdür. Buna görə də “Star” televiziyası və qəzetinin son çıxışları ciddi narazılığımıza səbəb olmuş və iki dövlətdə yaşayan bir millətin yetirdiyi dahi bir şəxsiyyət haqqında qərəzli informasiyaya görə onların hərəkətləri bizi dərindən hiddətləndirmişdir.
Lakin xalqın gözü ən böyük meyardır. Ölkənin hər tərəfində olduğu kimi, biz - Cəlilabad rayonunun ağsaqqalları da cənab Heydər Əliyevin hələ uzun illər ölkəmizə rəhbərlik etmək qüdrətində olduğunu bir daha təsdiq edirik. Eyni zamanda dağıdıcı müxalifətin növbəti pozuculuq fəaliyyətini qətiyyətlə pisyəlir, dezinformasiya daşıyıcılarına dərin hiddət və etirazımızı bildiririk. İstər daxildə, istərsə də xaricdə olan antiazərbaycan ünsürlər dərk etməlidirlər ki, heç bir bədxah qüvvə Tanrının istəkli bəndəsi olan Heydər Əliyevə üstün gələ bilməz.
Biz rayonumuzun bütün ictimaiyyəti adından tələb edirik ki, möhtərəm Prezidentimizin səhhəti ilə əlaqədar yalan məlumatlar yayan ziyankar qəzetlərin – “Yeni Müsavat”ın, “Hürriyyət”in, “Azadlığ”ın fəaliyyəti dərhal dayandırılsın, xalqımızı çaşdırmağa çalışan mətbuat orqanlarının rəhbərləri müvafiq qanunlar çərçivəsində cəzalandırılsınlar. Demokratiyanın anarxiyaya çevrilməsinə, özbaşınalığın yenidən cəmiyyətə sirayət etməsinə yol verilməsin. Çünki möhtərəm Prezidentimizin dediyi kimi, cinayətin cəzasız qalması dövlətin sarsılmasına səbəb olan iki amildən biridir.
Biz özünün mənalı həyatını, dövlətçilik məharətini və zəngin siyasi təcrübəsini həmişə Vətən üçün sərf edən cənab Heydər Əliyevi yenidən dövlətimizin başçısı görmək istəyirik. Ona görə də yekdilliklə belə qərara gəlmişik ki, 2003-cü il oktyabrın 15-də keçiriləcək növbəti prezident seçkilərində yalnız və yalnız möhtərəm Prezidentimizə səs verək. Çünki ulu Tanrı onu Azərbaycana xilaskar göndərmişdir. Əminik ki, cənab Heydər Əliyev növbəti prezident seçkilərinin də mütləq qalibi olacaq, başladığı genişmiqyaslı strateji planları uğurla həyata keçirəcəkdir.
Biz böyük Yaradandan diləyirik ki, möhtərəm Prezidentimizə uzun ömür, möhkəm cansağlığı bəxş etsin, Azərbaycanın çiçəklənəcək qüdrətli bir dövlətə çevrilməsi işində ona daim dayaq olsun.
V.Məmmədov - Cəlilabad Rayon Ağsaqqallar Şurasının sədri
N.Əliyev - rayon veteranlar şurasının sədri
S.Məmmədova - rayon qadınlar şurasının sədri
M.Mürsəlov - QMƏVŞA İctimai Birliyi rayon şurasının sədri
E.Əliyev - Qızıl Aypara Cəmiyyəti rayon təşkilatının sədri
Cəmi 298 imza.
Bölmənin digər xəbərləri
