“Aran” qəzetinin 90 illik yubileyi qeyd olunub
Ağcabədi, 22 iyul, Tahir Ağaməmmədov, AZƏRTAC
Azərbaycanın qocaman mətbuat orqanlarından biri, Ağcabədidə nəşr olunan “Aran” qəzetinin ilk nömrəsinin fəaliyyətə başlamasından 90 il ötür.
AZƏRTAC-ın bölgə müxbiri xəbər verir ki, bu münasibətlə keçirilən yubiley tədbirinin iştirakçıları əvvəlcə ümummilli lider Heydər Əliyevin Ağcabədi şəhərinin mərkəzi meydanındakı abidəsi önünə gül dəstələri düzərək, xatirəsini ehtiramla yad ediblər.
Sonra tədbir iştirakçıları Mədəniyyət Mərkəzinin foyesində “Aran” qəzetinin ötən dövrdəki fəaliyyətini əks etdirən sərgi ilə tanış olublar.
Sərgidə milli mətbuatımıza həsr olunmuş, həmçinin Ağcabədi yazarlarının kitabları, “Şəhidlər ölməz, Vətən bölünməz” bölməsində Vətən müharibəsi zamanı şəhidlik zirvəsinə ucalan 42 nəfər ağcabədili igid döyüşçü haqqında silsilə yazıların dərc olunduğu nüsxələr və onlara həsr edilmiş kitab nümayiş olunub.
Rayon ictimaiyyətin nümayəndələrinin, ziyalıların iştirak etdikləri tədbirdə şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib. “Aran” qəzetinin fəaliyyətinə həsr olunmuş videoçarx göstərilib.
Qəzetin redaktoru Məhsəti Musa çıxış edərək mətbu orqanın tarixi, keçdiyi yoldan danışıb. Məlumat verilib ki, 1932-ci ildən nəşr edilən qəzetin ilk adı “Ağcabədi pambıqçısı” olub. Qəzet 1966-cı ildən “Sürət”, 1990-cı ildən isə “Aran” adı ilə fəaliyyət göstərib. Hazırda qəzet həftədə iki dəfə 3000 nüsxə tirajla yayımlanır. Qəzetin “Aranqazeti.az” saytı və “Aran Ağcabədi” internet televiziyası da fəaliyyət göstərir.
Milli Məclisin deputatı Tahir Rzayev, Azərbaycan Yazıçılar Birliyinin sədr müavini, “525-ci qəzet”in baş redaktoru Rəşad Məcid, Vətən müharibəsi şəhidi Anar Cəfərovun həyat yoldaşı Samirə Xudiyeva, rayon qəzetinin ilk redaktorlarından olan Fərhad Ağayevin oğlu Mahir Ağayev, Gənclər üçün Təhsil Mərkəzinin Qarabağ regional ofisinin rəhbəri Radə Qafarova “Aran” qəzeti haqqında fikirlərini bölüşüb, qəzetin kollektivini yubiley münasibətilə təbrik ediblər.
Azərbaycan Mətbuat Şurasının İdarə Heyətinin üzvü Rəşad Məcid sözügedən qurumun diplomunu, Radə Qafarova isə xüsusi hədiyyəni qəzetin redaktoru Məhsəti Musaya təqdim ediblər.
Ağcabədi Rayon İcra Hakimiyyətinin başçısı Rafil Hüseynov yubiley tədbirində çıxış edərək “Aran” qəzetinin 90 illik tarixindən söz açıb, kollektivin xüsusilə son iki ildə qazandığı nailiyyətləri yüksək dəyərləndirib. Qeyd olunub ki, 90 illik fəaliyyəti dövründə “Aran” qəzeti rayonun ictimai-siyasi, iqtisadi və sosial-mədəni həyatında baş vermiş hadisələri, yenilikləri oxuculara çatdırmaqla rayonun bu dövrə aid salnaməsini yaradıb. Rayon rəhbəri “Aran” kollektivini yubiley münasibətilə təbrik edib, bir qrup əməkdaşa Ağcabədi Rayon İcra Hakimiyyətinin Fəxri fərmanını təqdim edib.
Sonra Məhsəti Musanın müəllifi olduğu “Mən Şuşadan gəlirəm” adlı videoreportaj nümayiş etdirilib.
Tədbir Ağcabədi Regional Mədəniyyət İdarəsinin tabeliyində fəaliyyət göstərən Qarabağ Muğam Mərkəzi, Ağcabədi Uşaq Musiqi Məktəbi və şəhər Uşaq İncəsənət Məktəbinin təqdimatında konsert proqramı ilə davam edib.
Bölmənin digər xəbərləri
