ARDNŞ VƏ “TOTAL” ARASINDA İMZALANMIŞ SAZİŞ ƏMƏKDAŞLIĞIN YENİ MƏRHƏLƏSİDİR
AZƏRTAC xəbər verir ki, Dövlət Neft Şirkətində (ARDNŞ) “Total” şirkətinin kontinental Avropa və Mərkəzi Asiya üzrə vitse-prezidenti Arno Breyakın rəhbərlik etdiyi nümayəndə heyəti ilə görüş keçirilmişdir.
Azərbaycanda olmaqdan məmnunluğunu ifadə edən A.Breyak “Total”ın ölkəmizdə uğurla həyata keçirdiyi layihələrin əhəmiyyətindən danışmışdır. O, ARDNŞ ilə “Total” şirkəti arasında “Xəzər dənizinin Azərbaycan sektorunda “Abşeron” dəniz blokunun kəşfiyyatı, işlənməsi və hasilatın Pay Bölgüsü haqqında Saziş”in əsas kommersiya prinsipləri və müddəaları haqqında Müqavilə”nin imzalanmasını yüksək qiymətləndirərək, bu hadisəni iki şirkət arasında əməkdaşlığın yeni mərhələsi kimi dəyərləndirmişdir.
Sonra Arno Breyak “Total E&P-Azərbaycan” şirkətinin baş meneceri Tyeri Normanın fəaliyyət müddətinin başa çatdığını bildirərək, onu əvəzləyəcək böyük menecer təcrübəsinə malik Mark Föyyadı ARDNŞ rəhbərliyinə təqdim etmişdir.
“Abşeron” bloku üzrə saziş imzalanması münasibətilə “Total”ın nümayəndələrini təbrik edən ARDNŞ prezidenti Rövnəq Abdullayev layihə çərçivəsində birgə səmərəli əməkdaşlığın davam edəcəyinə əminliyini söyləmişdir. Tyeri Normana gələcək fəaliyyətində uğurlar arzulayan ARDNŞ prezidenti onun işlədiyi dövrdə iki şirkət arasında yaranmış işgüzar münasibətləri Mark Föyyadın davam etdirəcəyinə ümidvar olduğunu bildirmişdir.
Görüşdə tərəfləri maraqlandıran digər məsələlər ətrafında fikir mübadiləsi aparılmışdır.
Bölmənin digər xəbərləri
