Avropa Şurası Parlament Assambleyasının yaz sessiyası öz işinə başlamışdır. Azərbaycan nümayəndə heyətinin üzvləri - Milli Məclisin parlamentlərarasi əlaqələr və beynəlxalq münasibətlər daimi komissiyasının sədri Səməd Seyidov, deputatlar Əli Abbasov, Rəfael Hüseynov, Nairə Şahtaxtinskaya, Gültəkin Hacıyeva, Qulamhüseyn Əliyev, Əli Hüseynov, habelə Milli Məclis Aparatının Beynəlxalq münasibətlər şöbəsinin müdiri Azər Qasımov sessiyanın işində iştirak etmək üçün Strasburqa gəlmişlər.

Aprelin 22-də səhər ilk iclasda sessiyanın gündəliyi təsdiq olunmuşdur. Gündəliyə Çeçenistan üzrə qarışıq işçi qrupunun hesabatı, Rusiya Federasiyasının öhdəlikləri yerinə yetirməsi, din üzərində Rusiya qanunu, Moldovada demokratik təsisatların fəaliyyəti, Ukraynada seçkilərə nəzarət, Beynəlxalq Qızıl Xaç Komitəsinin fəaliyyəti və AŞPA ilə əməkdaşlıq, Avropa təsisatları arasında gələcək əməkdaşlıq, Belçikada etnik azlıqların, Avropada qaraçıların hüquqi vəziyyəti, kütləvi informasiya vasitələrində qadınların rolu, Yaxın Şərqdə vəziyyət və digər məsələlər daxildir.

Güdəlikdə Azərbaycanla bağlı məsələ olmasa da, deputatlarımız ayrı-ayrı komissiyaların yığıncaqlarında fəal iştirak etmişlər.

Günün ikinci yarısında Ukraynada keçirilmiş seçkilərin nəticələrinin müzakirəsi olmuşdur. Həmin seçkilərin gedişini müşahidə etmiş deputat Əli Hüseynovun bu məsələyə münasibəti maraqla qarşılanmışdır. Gültəkin Hacıyevanın Beynəlxalq Qızıl Xaç Komitəsinin fəaliyyəti ilə bağlı çıxışı isə deputatlar arasında paylanmışdır.

Sessiya öz işini davam etdirir.

Əsgər Əliyev

AZƏRTAC-ın xüsusi müxbiri

Strasburq