Astara, 24 oktyabr (AZƏRTAC). Oktyabrın 24-də Astara Rayon Mədəniyyət Evində Yeni Azərbaycan Partiyasının (YAP) yaranmasının 20-ci ildönümünə həsr olunmuş toplantı keçirilmişdir.

AZƏRTAC xəbər verir ki, tədbir iştirakçıları əvvəlcə ulu öndər Heydər Əliyevin abidəsi önünə gül dəstələri düzərək xatirəsini ehtiramla yad etmişlər.

YAP Astara rayon təşkilatının sədr əvəzi Faiq Həsənov məruzə ilə çıxış etmişdir.

Partiyanın çox çətin, mürəkkəb bir şəraitdə, tarixi zərurətdən yarandığını vurğulayan məruzəçi bildirmişdir ki, xalqın geniş təbəqəsinin istəyini ifadə edən 91 nəfər ziyalı 1992-ci il oktyabrın 16-da Heydər Əliyevə müraciət edərək yaranmaqda olan siyasi hərəkata rəhbərliyi öz üzərinə götürməyi ondan təkidlə xahiş etmişlər.

Müraciəti imzalayanlar əmin idilər ki, müstəqilliyinə yenidən qovuşmuş Azərbaycan Respublikasını düçar olduğu bəlalardan, ağır və dözülməz vəziyyətdən çıxarmağa qadir yeganə şəxsiyyət Heydər Əliyevdir.

1992-ci il noyabrın 21-də Naxçıvan şəhərində keçirilən YAP-ın təsis qurultayında ümummilli lider Heydər Əliyev yekdilliklə partiyanın sədri seçilmişdir.

Qeyd olunmuşdur ki, xalqın təkidli tələbi ilə ulu öndər Heydər Əliyevin ikinci dəfə hakimiyyətə qayıdışı ilə Azərbaycanın siyasi həyatında yeni mərhələ başlanmışdır.

Qısa zamanda ümummilli liderin rəhbərliyi ilə ölkəmizdə vətəndaş müharibəsinə, dövlət çevrilişinə cəhdlərin qarşısı alınmış, Azərbaycanda demokratik, hüquqi və sivil dəyərlərə söykənən dövlət quruculuğu istiqamətində mühüm tədbirlər həyata keçirilmişdir.

Diqqətə çatdırılmışdır ki, YAP-ın IV qurultayında partiya sədrinin birinci müavini, böyük rəhbərin layiqli varisi İlham Əliyev Yeni Azərbaycan Partiyasının sədri seçilmişdir.

Ümummilli liderin siyasi xəttinin layiqli davamçısı, YAP-ın sədri, Prezident İlham Əliyev ulu öndərin ideyalarına sadiq qalaraq ölkə həyatının bütün sahələrində böyük inkişafa nail olmuşdur.

Bildirilmişdir ki, Yeni Azərbaycan Partiyasının mübariz dəstələrindən olan YAP Astara rayon təşkilatı öz sıralarında 150 ilk təşkilatın 6 minə yaxın üzvünü birləşdirir. Partiya üzvlərindən 2 min 396 nəfəri gənc, 2 min 289 nəfəri isə qadındır.

Tədbirdə YAP Siyasi Şurasının üzvü, professor Südeyif İmamverdiyev, Astara Rayon İcra Hakimiyyətinin başçısı Qəzənfər Ağayev, partiya fəalları əlamətdar yubiley münasibətilə siyasi həmfikirlərini təbrik etmiş, rayonun ictimai-siyasi, iqtisadi, sosial və mədəni həyatında partiya üzvlərinin əməyini yüksək qiymətləndirmişlər.

Bayram mərasimində partiya üzvlərindən bir qrupuna fəxri fərmanlar, YAP sıralarına yeni qəbul olunmuş gənclərə üzvlük vəsiqələri təqdim edilmişdir.