ATƏT NÜMAYƏNDƏLƏRİ İCTİMAİ TELEVİZIYA VƏ RADİO YAYIMLARI ŞİRKƏTİNDƏ OLMUŞLAR
AZƏRTAC xəbər verir ki, iyunun 17-də ATƏT-in Demokratik Təsisatlar və İnsan Hüquqları Bürosunun (DTİHB) seçki məsləhətçiləri İctimai Televiziya və Radio Yayımları Şirkətində olmuşlar.
İctimai teleradionun fəaliyyəti barədə qonaqlara ətraflı məlumat verən şirkətin baş direktoru İsmayıl Ömərov bildirmişdir ki, avqustda efir fəaliyyətinin 3 ili tamam olacaq televiziya bu müddətdə uğurlu yaradıcılıq yolu keçmişdir.
İctimai teleradionun Bi-Bi-Si-nin iş təcrübəsinə yiyələndiyini deyən İ.Ömərov əlavə etmişdir ki, ATƏT-in dəstəyi ilə qurumun tanınmış ekspertləri hazırda şirkət kollektivi üçün təlimlər keçir.
Bildirilmişdir ki, oktyabrda ölkəmizdə keçiriləcək prezident seçkiləri ərəfəsində namizədlər üçün ödənişsiz efir yalnız İctimai teleradioya həvalə olunmuşdur. Teleradio öz növbəsində bu seçkiləri qanun çərçivəsində, beynəlxalq standartlara uyğun işıqlandıracaqdır. Namizədlərin təşviqat kampaniyasının hansı formatda aparılması onların özlərinin iştirakı ilə müəyyənləşdiriləcəkdir. Bundan əlavə teleradio əhalinin seçkidə fəal iştirakını təmin etmək məqsədi ilə maarifləndirici proqramlar da hazırlanacaqdır.
ATƏT nümayəndələri bildirmişlər ki, ATƏT seçki prosesini işıqlandıran KİV-lərin monitorinqini aparmaq üçün Azərbaycana qrup göndərəcəkdir.
Bölmənin digər xəbərləri
