AVROPA GƏNCLƏR FORUMUNUN ÜZVLƏR ŞURASI İCLASININ İŞTİRAKÇILARINA
Hörmətli gənclər!
Sizi - Avropa Gənclər Forumunun Üzvlər Şurası iclasının iştirakçılarını ürəkdən salamlayır, hər birinizə ən xoş arzularımı çatdırıram.
Gənclər cəmiyyətin ən fəal təbəqəsidir və hər bir xalq ümidini gənc nəsillə bağlayır. Dünya ölkələri gənclərinin bir-birilə sıx təmasda olmaları, həyatın müxtəlif sahələrində əməkdaşlıq etmələri təqdirəlayiq haldır. Bu cəhətdən Azərbaycan Respublikası Gənclər Təşkilatları Milli Şurasının Avropa Gənclər Forumu ilə əlaqələrinin möhkəmləndirilməsi və inkişaf etdirilməsinin böyük əhəmiyyəti vardır.
Fərəhləndirici haldır ki, bu gün Azərbaycanda milli-mənəvi dəyərlərimizi, ana dilimizi, adət-ənənələrimizi qoruyub yaşadan, eyni zamanda ümumbəşəri ideyaları mənimsəyərək, dünyanın qabaqcıl gəncliyi ilə inteqrasiya etməyə qadir olan gənc nəsil yetişmişdir və o, Azərbaycanın müstəqilliyinin möhkəmləndirilməsi naminə var qüvvəsi ilə fəaliyyət göstərir.
Ölkəmizdə müstəqil dövlət quruculuğunun fəal iştirakçısı kimi gənclərə lazımi diqqət və qayğı göstərilir. Gənclərimizin ictimai, siyasi və mədəni həyatda daha yaxından iştirakı üçün əlverişli şərait yaradılır, problemlərinin həlli istiqamətində mühüm tədbirlər həyata keçirilir. 2007-ci ilin Azərbaycanda “Gənclər ili” elan edilməsi onlara dövlət qayğısının bariz nümunəsidir.
Ermənistan-Azərbaycan, Dağlıq Qarabağ münaqişəsi respublikamızda gənclərin həyatına öz mənfi təsirini göstərmişdir. Münaqişə nəticəsində neçə-neçə Azərbaycan gənci şəhid olmuşdur. Erməni silahlı birləşmələri tərəfindən işğala məruz qalmış ərazilərimizdə uşaq və gənclərin məşğul olduqları yüzlərlə təhsil müəssisələri, uşaq-gənclər yaradıcılıq mərkəzləri, müxtəlif idman qurğuları dağıdılmış, həmin müəssisələrdə uzun illər ərzində formalaşdırılmış qiymətli maddi-texniki baza bütünlüklə qarət edilmişdir.
Son illər Azərbaycan iqtisadiyyatının dinamik yüksəlişi ölkənin mədəni-intellektual və sosial-iqtisadi potensialından, eləcə də ictimai-siyasi qüvvələrindən səmərəli istifadə olunmasını tələb edir. Bütün bunlar iqtisadiyyatın, mədəniyyətin, elmin tərəqqisi baxımından gənclərimiz qarşısında geniş perspektivlər açır və onlara bəslənilən ümidləri artırır.
İnanıram ki, bu görüşünüz Azərbaycan Respublikası Gənclər Təşkilatlarının Milli Şurası ilə Avropa Gənclər Forumuna üzv olan təşkilatlar arasında müxtəlif sahələrdə əlaqələrin daha da inkişaf etdirilməsi və dərinləşdirilməsinə təkan verəcək, respublika gənclərinin Avropa məkanında cərəyan edən proseslərdə yaxından iştirak etməsinə zəmin yaradacaqdır.
Sizin hamınıza cansağlığı, uzun ömür və ölkələrinizdə gənclər hərəkatının geniş vüsət alması naminə uğurlar diləyirəm.
İlham Əliyev
Azərbaycan Respublikasının Prezidenti
Bakı şəhəri, 26 aprel 2007-ci il.
Bölmənin digər xəbərləri
