Avropa İttifaqı böyük problemlərini kiçik Ermənistan vasitəsilə həll edə bilməyəcək - RƏY
Bakı, 23 iyul, AZƏRTAC
Avropa İttifaqı (Aİ) Şurası Ermənistanla viza rejiminin liberallaşdırılması ilə bağlı danışıqlara başlamağa qərar verib. Ölkədə demokratik vəziyyətin kritik halda olduğu, əhalinin yarıdan çoxunun xaricidə yaşadığı bir halda viza rejiminin yumşaldılması Ermənistan üçün imkanlar yaratmayacaq. Bu, boşalmağa doğru gedən ölkədə əhalinin qaçışı üçün yeni qapı açılmasıdır. 1990-cı ildən bəri erməni əhalisinin sayı 1 milyona yaxın azalıb. Əlbəttə, bunun yaranmasında Ermənistan dövlətinin və onu idarə edənlərin böyük rolu var. Azərbaycanla müharibə və Türkiyəyə qarşı torpaq iddiaları, işğalın davam etməsi üçün silahlanma ölkənin iqtisadi blokadaya düşməsinə və nəticədə iqtisadi-sosial vəziyyətin ağırlaşmasına səbəb oldu. Nəticədə də vətən sevgisi olmayan, daim köçəri həyat sürən, işləyə, pul qazana bildiyi yeri özü üçün vətən hesab edən ermənilərin ölkədən miqrasiyası başladı. Hətta erməni mətbuatının və rəsmilərinin bildirdiyinə görə Azərbaycanın işğal edilmiş torpaqlarında yaşayan, “bizi burdan heç kim çıxarda bilməz, biz ölənə kimi mübarizə, müharibə edəcəyik deyən” və nəticədə törətdikləri cinayətlərə görə məsuliyyətə cəlb ediləcəklərindən qorxaraq qaçan ermənilərin də böyük əksəriyyəti Ermənistanı tərk edərək Rusiyaya və başqa ölkələrə gediblər.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
O bildirib ki, Avropa İttifaqı viza rejiminin liberallaşdırılması ilə Ermənistanı Rusiyanın təsirindən qurtaracağını zənn edirsə, yanılır. Çünki hazırda Ermənistan əhalisinin böyük əksəriyyəti ikili pasporta məxsusdur, yəni, Rusiya vətəndaşlıqları da var. Eyni zamanda, Ermənistanla Rusiyanın ticarət dövriyyəsi son zamanlar süni yollarla bir neçə dəfə artaraq ümumi ticarət dövriyyəsinin 60 faizini təşkil edir. Ermənistan elə Aİ-nin də daxil olduğu Qərb blokunun Rusiyaya tətbiq etdiyi sanksiyaların yarılmasında, Kremlin sanksiyalara daha dözümlü olmasında və Ukraynaya qarşı müharibəni davam etdirə bilməsində rol oynayır. Əgər Avropa İttifaqı həqiqətən səmimi olaraq Ermənistanın inkişafında, Rusiyanın təsirindən çıxmasında maraqlıdırsa, əvvəlcə İrəvanı sanksiyaların yarılmasında iştirakına görə qınamalı, sonra iqtisadi blokadadan çıxması üçün qonşularına qarşı torpaq iddiasından çəkinməsini, Azərbaycanın təklif etdiyi böyük nəqliyyat – kommunikasiya imkanlarından istifadə etməsini və silahlanmadan çəkinməsini təşviq etməlidir.
“Avropa İttifaqı sərvətlərini istismar etdiyi Afrika və İslam ölkələrinin xalqları üçün viza rejimini sərtləşdirdiyi bir zamanda Ermənistana qarşı belə loyallıq nümayiş etdirməsi irqi, dini ayrı-seçkilik və xristian təəssübkeşliyidir. Əhalisinin qocaldığı, təbii artımın sürətlə azaldığı, LGBT-nin təbliğ olunduğu Avropa İttifaqı böyük problemlərini kiçik Ermənistan vasitəsilə həll edə bilməyəcək. Ermənistan əhalisinin ölkəni tərk etməsi davam edən prosesdir. BMT-nin proqnozlarına görə 2050-ci ildə Ermənistan əhalisinin 1, 5 milyon nəfərə qədər azalma ehtimalı var. Bunun əsas səbəbləri doğumun azalması, əhalinin qocalması ilə yanaşı, əhalinin ölkəni sürətlə tərk etməsi olacaq. Yəni görünən odur ki, Aİ ilə viza rejiminin yumşaldılması Ermənistan üçün demoqrafik vəziyyətin daha da pisləşməsinə, ölkənin boşaldılmasına gətirib çıxaracaq. Gürcüstan və Baltikyanı ölkələri də Avropa İttifaqı ilə belə bir razılaşmadan sonra problemlə üzləşmiş, ölkədən əmək qabiliyyətli əhalinin sürətlə çıxmasına, Aİ ölkələrində ucuz işçi kütləsinə çevrilməsinə şahid olublar. Avropanın Ermənistanla viza liberallaşması üzrə dialoqun başlamasında əsas məqsədi ucuz işçi qüvvəsi cəlb etməkdir. Ciddi demoqrafik krizisdə olan Ermənistan üçün bu daha da dərin əhali böhranına səbəb olacaq. Avropa İttifaqı ilə viza rejiminin ləğv edilməsi nəticəsində Gürcüstanı indiyədək yüz minlərlə (rəqəm araşdırılmalıdır) insan tərk edib. Eyni vəziyyət Baltikyanı ölkələrdə də müşahidə edilir”,- deyə politoloq vurğulayıb.
Bölmənin digər xəbərləri
