AVROPA KOMİSSİYASI ÖLKƏMİZDƏ TEXNİKİ PEŞƏ TƏHSİLİNİN İNKİŞAFINA QAYĞI GÖSTƏRİR
AZƏRTAC-ın xüsusi müxbiri xəbər verir ki, Avropa Komissiyası Azərbaycanda texniki peşə məktəbləri üçün yeni tipli binaların tikintisinə qrant ayırmışdır.
Həmin qrant əsasında binaların tikintisində iştirak edəcək xarici şirkəti müəyyənləşdirmək üçün Təhsil Nazirliyinin əməkdaşı Natiq Məmmədov mayın 25-dən 30-dək Brüsseldə səfərdə olmuşdur. O demişdir ki, Azərbaycan Respublikası Prezidentinin müvafiq Sərancamı ilə ölkəmizdə texniki peşə təhsilinin inkişafı üzrə Dövlət Proqramı qəbul edilmişdir. Proqrama əsasən, müxtəlif sahələri əhatə edən peşə təhsili müəssisələrinin açılması nəzərdə tutulmuşdur. Bunun üçün xüsusi layihə hazırlanmışdır. Layihənin həyata keçirilməsi üçün Avropa Komissiyası 2 milyon 500 min 500 avro məbləğində qrant ayırmışdır. Bu qrant Azərbaycanda texniki peşə təhsilinin yenidən qurulmasına, həmçinin İsmayıllı rayonunda turizm və digər sahələri əhatə edən müasir tipli peşə məktəbinin yaradılmasına sərf olunacaqdır.
Layihənin həyata keçirilməsi üçün beynəlxalq məsləhətçi şirkətin seçilməsi ilə əlaqədar Brüsselə səfər etmişik.
Şirkət müəyyənləşdirildikdən sonra layihənin həyata keçirilməsi üçün rəsmi fəaliyyətə başlanacaqdır.
Bölmənin digər xəbərləri
